La llancha rápida "Ady Gil" de la organización ecoloxista internacional "Sea Shepherd" (Pastor de la Mar) foi fundida esta selmana nel primer choque de la temporada, por mor de l'acometida del balleneru xaponés Shonan Maru 2.

Tres l'incidente, l'Institutu Xaponés d'Investigación de Cetáceos espublizó un vídeu de los fechos, y "Sea Shepherd" distribuyó'l suyu.

Esti asocedíu motivó un intercambiu d'acusaciones ente ecoloxistes y balleneros y una reaición de los gobiernos de Nueva Zelanda y Australia, que pidieron calma y anunciaron l'apertura d'una investigación.

Mentanto, Tokio protestaba por una supuesta agresión de los ecoloxistes del "Sea Sheperd", grupu fundáu en 1977. Esta organización ecoloxista qu'asegura emplegar "táutiques anovadores" escontra los cazadores de ballenes, tiburones, tolines y tortugues, despliega los sos barcos en tolos océanos.

Na Antártida, esti escenariu belicosu repítese dende 1988, añu nel que Greenpeace llevó a cabu la so primer misión neses agües al envís de torgar les actividaes de los balleneros demientres la temporada de caza, n'avientu.

De magar entós, cásique cada temporada, los pesqueros nipones y los barcos conservacionistes engarrense en batalles con disparos fechos con cañones d'agua, llancense bombes fedientes a la cubierta y maniobren pa tentar bloquiar el pasu del rival, llegando en casos a colisionar.

El buque-factoría xaponés Nisshin Maru embistió en xineru de 2006 al barcu de Greenpeace Arctic Sunrise n'agües de l'Antártida, cuando navegaba con 25 activistes a bordu, anque nengún resultó mancáu.

Un añu dempués, un incendiu fortuitu a bordu del balleneru Nisshin Maru causó la muerte d'ún de los miembros de la tripulación y nun aparente xestu de solidaridá, el navíu Esperanza de Greenpeace ufrió ayuda al buque nipón. La organización ecoloxista continuó cola so misión hasta algamar que la totalidá de los balleneros abandonaren la zona na que faenaben.

Demientres la campaña 2007-08, los ecoloxistes recibieron apoyu del gobiernu australianu, que vixiló a los balleneros xaponeses dende'l barcu "Oceanic Viking" pa tener pruebes gráfiques de soporte a les aiciones llegales entamaes escontra los buques na Antártida que nun tean en misión científica.

Foi entós cuando apaez la "Sea Shepherd Conservation Society", grupu con base n'Estaos Xuníos que tien como oxetivu conservar la fauna marina.

El fundador del grupu, Paul Watson, ye un ecoloxista que califica a Greenpeace (organización de la que foi miembru) como "revisionista" y criticala por considerar qu'elude la "aición direuta" p'algamar los oxetivos.

Greenpeace aparó les sos actividaes na Antártida tres la campaña 2007-08, p'adoptar otra estratexa.

"Ye necesariu facer camudar l'albidru públicu dientro de Xapón, pues a nivel internacional la presión nun pue ser más intensa, la mayoría de la xente ta a la escontra de la matanza de ballenes", dixo a l'axencia EFE su portavoz, Caroline Wenzel.

Los balleneros xaponeses planien cazar demientres esta temporada 935 rorcuales aliblancos y 50 ballenes d'aleta, como parte d'una campaña que sostienen ye "con fines científicos".