Enxamás nagüé
llamber caleyes
pa qu'a vós nun vos
faltare de res.

Pero eso sí,
vós pela cueta
de la mio xera
xintastis bien.

(x2)

Acabósevos el chollu
anguaño yá me farté
barro pa la mio fastera
y a vosotros que vos den.

Camiento que ye obligatoriu
facer yá la revolución.

Dinamitar esti sistema
porque tenemos más d'una razón.
Pa decidir per nosotros
ensin pidir opinión
¿Esos tipos con corbata
quien ******** son?

Mientres quede dinamita
mientres que nos quede alcohol
mientres que nos queden griesques
guerra a muerte al opresor.

(x2)

¡Borrachos y dinamiteros!.

(x2)

¡Antifacistas dinamiteros!

--------------------------

La hestoria d'esti grupu de Gozón tien dos partes bien estremaes: un enantes y un dempués del asturianu. Yá a finales de 1985 esistía una formación con esi mesmu nome onde Manolo (militante anarquista verdaderu ánima de la banda) cantaba ya intentaba facer rock xunto a Quilo (guitarrista de La Felguera que daquella tocaba nun grupu nomáu RIP), Fredo (baxista tamién de La Felguera que naquella dómina repartía'l so tiempu con Quemándose Vivos) y El Negro (batería de Lluanco). El so repertoriu yera dafechu en castellanu y duraron como grupu malpenes unos meses.

La segunda y definitiva formación quedó encadarmada como tríu y tolos sos componentes del conceyu gozoniegu: Manolo (de Nembro, encargábase de la guitarra y la voz), El Negro (del barriu lluanquín de Tocote, a la batería) y Frecho (de El Crucero, al baxu). Siguíen cantando en castellanu y como llugar d'ensayu contaben cola corte del pá d'ún d'ellos, ehí grabaron una maqueta con cinco temes titulada "Asturies se la juega" espardiéndola ente collacios. Nello taben cuando, de sécute, Manolo hubo colar pa Salamanca, quedando'l grupu paráu.

Ye xustamente nesa ciudá, tocando la guitarra na cai pa sacar unes perres, onde'l nuestru protagonista conoz a un rapaz de Llanes qu'ellí mesmu-y canta dellos temes n'asturianu compuestos por él, "aquello dexóme mui flipáu". Darréu d'esti alcuentru Manolo torna p'Asturies, depriende la llingua, entama a componer n'ella "porque presta" y de nuevo xunta al grupu. Ufierten dellos conciertos onde amuesen el so vigorosu punk-rock de lletres, agora comprometíes a esgaya, cachondes ya iróniques, con influyencies de Leño, Parálisis, Permanente, La Broma de Satán, Último Resorte... y en xeneral de tolos grupos del Rock Radical Vascu.

Títulos como "Xuacu, xinta xorra" (cantar que llueu versionaría y fadría famosu Dixebra), "Si queréis guerra vais tenela" (sobre'l conflictu llingüísticu), "Ma ú ta pá" (onde se diz que l'asturianu tien raigón africanu), "Borrachos y dinamiteros" (el qu'entama esti artículu), "Vaqueiraes terroristes" o "Pelayu yera un babayu que nun punxo'l bable llingua oficial" formen parte del so repertoriu musical.

Participaren con dos cantares, grabaos nel Conciertu pola Oficialidá na cassete titulada "Esto ye lo ke hai" en sofitu a l'Asamblea Okupa de Xixón, onde apaecíen bandes como UHP, Dixebra, Eskándalo Públiko, Puxarra o Intolerance, siendo ún de los primeros recopilatorios asturianos d'esti cartel y onde ocho de los temes son n'asturianu.

Nel añu 1988 Karne Antisocial deciden dexalo alcordándose más llueu d'aquello como un tiempu perprestosu: "tuvimos mala suerte por circunstancies cabrones de la vida, teníemos trés acordes, enerxía y daqué que dicir".

Info: "Llingua y Rock (1976-1996)" de Xune Elipe.