Semeya: Wikimedia

Depués de lleer la noticia asoleyada por un compañeru de redaición n'Aruelu onde s'espresaba'l deseu del Gobernador de Texas d'independizase d'EEXX si continuen les polítiques de la nueva alministración Obama, decidí informame dalgo más y topeme colo que ye titular d'esti artículu. Chuck Norris ye independentista.

El famosu especialista n'artes marciales y protagonista de películes y series de televisión d'esi xéneru acaba de facer públicu que quier ser Presidente d'una Texas independiente.

Chuck Norris siempre tien feches declaraciones qu'amuesen que ye votante republicanu de la faza dura del partíu. De fechu ya fuere propuestu por Mike Huckabee, antiguu gobernador d'Arkansas, y pastor baptista como secretariu de Defensa si llograba imponese nes primaries republicanas al que foi finalmente elegido, John McCain.

Les últimes afirmaciones secesionistes de la estrella d'aición a les que refiero fízoles nuna discusión política na cadena estaunidense CNN, na que se postuló non como candidatu a gobernador del Estáu de Texas, sinón como presidente d'un futuru país texanu y, como non, republicanu.

Según Chuck Norris, l'Estáu de Texas siempre quixo la independencia y sigue queriendola por culpa del Gobiernu federal d'Estaos Xuníos, que, cuida, maltrata a los texanos y a la so tierra. Y, nesta llinia, cree qu'él sedría'l candidatu ideal pa llevar a cabu "la revolución independentista" nel Estáu conocíu como "La Estrella Solitaria", en referencia a la so bandera. "A lo meyor presentome a la carrera pa la Presidencia de Texas. Y eso pue qu'asoceda munchu más pronto de lo que creemos. Si nun soi yo, pue que daquién se presente pa ser el presidente del Estáu de la Estrella Solitaria, si la situación del nuesu país continúa nesi camín de convertise nun enemigu del propiu país", sentenció Norris. "Cualquiera que tuviera en Texas demientres dalgún tiempu sabe esautamente qué ye lo qu'habríemos facer si les coses se ponen fees n'Estaos Xuníos", fina Chuck Norris.

Encuesta desfavorable:
Pese a les declaraciones, tanto del actual gobernador del Estáu, como les de Chuck Norreis la realidá ye qu'un 75% de los texanos amosóse a favor de siguir perteneciendo a Estaos Xuníos, según un sondeu dau a conocer güei, d'otra banda'l 31% de los residentes de Texas sostienen que l'estáu tien el derechu d'independizase del restu de la xunión, anque namás que'l 18 por cientu de los votantes de la entidá votaríen a favor.

Fontes: Europa Press y Milenio.com

Un saludu.