Dende la federación de partíos, plantégase'l “Día de la Nación Asturiana” como un bon momentu pa denunciar la reforma estatutaria del PSOE y PP y afitar l'alternativa que representa la izquierda nacionalista.

La Xunta Executiva de la federación d'izquierda nacionalista, dio anuncia esta mañana que la formación va facer esti añu'l Día de la Nación Asturiana nel conceyu de Carreño, en concreto en Candás, au cunta con representación municipal a traviés del conceyal Santiago Artime.

UNA naz tres refundase UNIDÁ, coalición eleutoral formada pola xuntura ente Izquierda Asturiana (IAS) y Andecha Astur (AA), nuna federación de partíos y recuperar la siegla histórica de la izquierda nacionalista UNA.

Dende la Xunta Executiva d'UNA plantégase que l'8 de setiembre ye un bon momentu pa entamar a afitar y articular l'alternativa que la izquierda nacionalista propón p'Asturies y que se va dir presentando per tola xeografía asturiana nos próximos meses.

Los actos concretos del 8 de setiembre van centrase na denuncia de la reforma del estatutu d'Autonomía que PSOE y PP pactaren p'Asturies y que dende UNIDÁ NACIONALISTA ASTURIANA considérense humillantes, irresponsables, discriminatorios y ayenos dafechu a les necesidaes del país.

Nos próximos díes dende la Xunta Executiva va dase a la conocencia pública les actividaes concretes, polítiques y lúdiques, que van tener llugar el llunes 8 en Candás.

http://www.unida.as/2008/unida-nacionalista-asturiana-celebra%e2%80%99l-8-de-setiembre-presentando%e2%80%99l-so-proyectu-politicu-en-carreno/