UNIDÁ NACIONALISTA ASTURIANA (UNA) dende la so estaya de vivienda, retrucó-y al conceyal del Ayuntamientu de Xixón, Faustino García, por aporfiar en que la ocupación de la antigua fábrica de Flex yera un actu illegal.

Pa UNIDÁ, la ocupación de la fábrica de Flex como espaciu públicu y d’usu social ye una aición cívica y responsable de los promotores del Centru Social ReFLEXón, que “énte l’ausencia d’iniciativa municipal p’afrontar la necesidá d’espacios públicos y viviendes pa los ciudadanos, vense obligaos a suplir esta falta d’iniciativa municipal con actuaciones direutes” que “anque illegales, camentamos dafechamente responsables y cíviques”.

UNIDÁ NACIONALISTA ASTURIANA (UNA) criticó que l’Ayuntamientu de Xixón nun tenga una política urbanistica que vaiga acullá “de la política de saquéu y desaniciu de la zona rural de Xixón, con midides más axustaes a les necesidaes de les empreses constructores qu’a les necesidaes de los ciudadanos”, qu’esternamente asemeya un “xeitu llegal d’actuar” pero qu’esconde una verdadera irresponsabilidá política dende’l puntu de vista de la xestión público”.

Dende la organización nacionalista destácase la intención del Centru Social ReFLEXón d’encadarmar formes de democracia participativo pa implicar a los vecinos de la redolada la fábrica abandonao. “Pa nós, ún de los oxetivos básicos ye introducir nel máximu de xestiones municipales que seya posible, ferramientes de participación direuta de los ciudadanos” y esti tipu d’actuaciones amuesa que “la sociedá xixonesa ta maduro p’aplicales d’un mou inmediatu”.

UNIDÁ llamentó otra vuelta que la “izquierda plural” que dicen representar PSOE ya IU nel Ayuntamientu de Xixón namás qu’emplegue la llei “pa torgar los derechos ciudadanos y a los movimientos sociales de la ciudá”, anque nun seyan tan respetuosos pa col Plan Urbanísticu de Xixón, cuando nun respeten la proteición paisaxístico de les zones de Xove que tán acabantes de recalificar pa satisfaición de los constructores.