Demientres la manifestación escontra'l G8 del 5 de xunetu en Sapporo foron deteníes 4 persones, magar que la protesta taba autorizada, foi dafechu pacifica y desendolcose ensin nenguna mena de dañu escontra la propiedá nin les persones, sacante los que produxo la propia policía.

Un camarógrafu de l'axencia Reuters foi deteníu acusáu de pegar una patada a un policía, nun momentu en qu'un grupu de reporteros esforcexaba con un cordón d'antidisturbios que, a emburriones, torgaba a la prensa averase a los manifestantes (vídeu). El segundu deteníu ye un activista que taba pinchando musica dende un camión con megafonía que formaba parte de la marcha, siendo deteníu por un grupo de policíes de paisano cuando baxó un momentu del camión.

Les otres dos detenciones produxéronse cuando la policía fexo un ataque escontra esi camión, magar que los organizadores de la protesta teníen permisu pa llevalu como parte del bloque. Hacia'l final de la manifestación varios cordones d'antidisturbios arodiaron de sutrucu'l camión, mientres un grupu de policíes de paisano tomaben la caxa del camión y deteníen al dj que reemplazara al primer activista y otru grupu de secretes abalanzábense sobre la cabina, frañíen la ventanina del camión p'abrir la puerta y sacaben en volandes al conductor, que foi violentamente arrestáu (vídeu). Los trés activistes deteníos tán acusaos de “violación de la llei de traficu”, “violación de la ordenanza sobre manifestaciones de Sapporo” y “estongamientu del llabor de la policía”.

El periodista foi lliberáu'l llunes 7 pela tarde, pero los otros trés arrestaos foron llevaos énte'l xuez el martes pela mañana que tien decretao la prollongación de la detención por diez díes en réxime de “prisión sostitutiva”. Esti réxime ye percriticáu poles organizaciones de drechos humanos pos supón que'l deteníu continúe en manes de la policía, sometíu a constantes interrogatorios a lo llargo de munches hores, incluyíes les de sueñu, teniendo que tar continuamente sentáu sobre les rodíes nuna postura estática. Ye común que demientres estos arrestos, la policía rexistre'l domiciliu de la persona detenida y de la so familia, anque esta nun tenga venceyu nengún coles sos actividaes, lo que supón un castigu añadíu. Arriendes, un arrestu d'esta mena pue ser prollongáu diez díes más, polo que'l periodu de detención máxima en Xapón ye de 23 díes.

Mañana día 12, al cumplise una selmana de les detenciones, se van realizar actos de sofitu a estos trés activistes en cinco ciudaes xaponeses pa esixir la so lliberación. Los convocantes piden apoyu internacional organizando actos nesa mesma data frente a les embaxaes y consulaos xaponeses.

Gracies a Anticapitalistas.net, fueyaenblancu siguirá informando n'asturianu del tema.