Entafarraos. Cualloto

Bono, doivos l'anuncia de qu'amesto una nueva seición al blogue, nesti casu de semeyes, que voi dir xubiendo y que tengo na mio cuenta de FLICKR. Tamién aviso que nun ye con nengún envís artísticu, asina que nun gueteis arte nengún nes mios semeyes, nin siquiera daqué guapo, que yo nun tengo nin idea de facer una bona semeya.

Xébrase en trés estayes, Cartelos, campañes y pintaes n'ast, Esto ye Asturies y Manifestaciones y actos

La cuenta ye la que vien darréu.

Delles vegaes topareisvos con semeyes que cuasi nun tienen comentariu y otres con un pocoñin d'historia, como esta.

Ponte vieya. Cualloto

La ponte, que pasa penriba de les agües del ríu Nora, ye de mampostería y sillarín, ufre un tránsitu de triple tramu, tien dos arcos semicirculares y na basa central apaez adosáu un cuerpu de basa triangular, sobre'l que s'abre un güecu rectangular que termina n'irregular arcu de mediu puntu.

Anque la tradición atribúi la esistencia d'una primitiva construcción romana, les socesives trensformaciones y reformes torguen la so datación.

Un saludu.