¿UN CSOA N'ASTURIES? OXALÁ
Atopo en Glayíu la viniente noticia que piden que tenga la máxima difusión y quiero collaborar n'ello.
"Queremos comunicar dende la organización anarquista UAR/XAR Asturies, que'l prósimu día 31 de mayu, sábadu, fadráse una folixa nel chigre'l Bache (C/Almacenes bocacai de Marqués de San Esteban) de Xixón, a les 21:00 h., col envía de recaldar fondos pal proyeutu de creyación d'un CSOA n'Asturies.
El nuesu proyeutu, ye ambiciosu y abegosu, sabémoslu. Tamién les nueses ganes de creyar y construyir al marxe del sistema ye pergrande. Somos optimistes, poro, seique, somos anarquistes... Lo de nós son les utopíes. A vegaes, unes más abegoses qu'otres, pero eso nun les fai imposibles.
Sabemos que la creyación d'un CSOA ye un trabayu perduro, que necesita tiempu y dedicación, ganes y a vegaes daqué de frustración. Impotencia en dellos casos. La meta ye lo que cunta, los resultaos tamién. El tirar la toballa de magar un entamu nun mos apurra ren.
Si s'algama sedrá un gospiu importante de los Mov. Sociales n'Asturies. Sedrá un llugar de rexunión ente la xente del barriu u s'afaye. Un llugar de cambéu del sistema, con actividaes infinites.
Pa qu'esto seya posible necesitamos el vuesu gabitu, el vuesu sofitu y collaboración."
Pa los que nun teais familiarizaos col tema de los CSOA, apúrrovos una simple definición.
Los CSOA (abreviatura de Centru Social Ocupáu Autoxestionáu), traten de satisfacer dende l'autoxestión y la recuperación d'espacios la necesidá de la mocedá de desendolcar actividades alternatives al fuelgu relacionáu col consumu. N'ellos desarróllense talleres de toa mena, conciertos (de baldre o mui baratos), comedores populares (normalmente vexetarianos/veganos), campionatos deportivos, charres sobre cualquier tema, asina como cualquier otra actividá pa facer una coleuta, yá seya pal propiu CSOA o bien en beneficiu de deteníos en manifestaciones, presos políticos o cualquier coleutivu que lo solicite y se comprometa a organizala.
La verdá que n'Asturies son perpoques les esperiencies d'autoxestión pero hai esceiciones como los compañeros del Centru Social Sestaferia.
¡POR UN CSOA N'ASTURIES!
Esbilla
del.icio.us
VITY
Peime que te falta una parte muito importante na definición de lo que yia un CSOA: el sou carácter revolucionariu ya antisistema, pol simple feito de despreciar la propiedá privada, amás de la parte contracultural que representan.
Oxalá este proyectu salga p'alantre, Asturias ta muerta n'esa "estaya". Fai falta un pouco (ou muito) de combate na cai. Ya oxalá sigan faciendo uso del asaturianu, anque taba bien que nun lo forzaran tanto, igual toca echar una mano nesa parte.
¡¡¡Salú ya Puxa!!!