Depués de muncho menos tiempu del que pensé vuelvo abrir los filos d'esti humilde blogue. Con ganes de dar caña y de siguir les vindicaciones del país convidovos a participar na convocatoria de la "Xunta pola defensa de la llingua asturiana" pal llunes 14 d'Abril a les 9:30 de la mañana.

Cartelu de la convocatoria

Testu de la convocatoria:

El prósimu llunes 14 d'abril, los grupos parllamentarios representaos na Xunta Xeneral van aconceyar pa tratar sobre la reforma del Estatutu d'Autonomía d'Asturies. Esta nueva reforma ye posiblemente la última oportunidá de poder cuntar, por fin, con un estatutu que s'axuste a la nuesa realidá cultural y llingüística, y que reconoza los mesmos derechos a tolos ciudadanos, falen la llingua que falen.

La Constitución española recueye nel so artículu 3u, “Les demás llingües españoles (amás del castellanu) serán tamién oficiales nes respectives Comunidaes Autónomes d’alcuerdu colos sos Estatutos”. Por eso, va más de 25 años, los parllamentos de Galicia, País Vascu, Navarra, Cataluña, Valencia y Les Isles Baleares aprebaron los sos estatutos reconociendo les sos llingües propies como oficiales, garantizando asina la protección del so patrimoniu llingüísticu y el respetu a los derechos de los sos ciudadanos.

Asturies foi la excepción, la única comunidá con llingua propia que nun la reconoció como oficial.

Nesti tiempu evidencióse que mientres el restu comunidaes supieron dar valor al so patrimoniu llingüísticu, convirtiéndolu nun potente dinamizador social y económinu; n’Asturies siguimos despreciando esi potencial, día tres día la nuesa llingua ta perdiendo falantes y ámbitos d’usu, y sigue siendo motivu de discriminación y vergüenza.

Agora vuelve abrise la oportunidá de tornar esta situación. Esta reforma del Estatutu d’Autonomía tien que recoyer la única reivindicación ciudadana n’Asturies que se vien manteniendo constante nos últimos trenta años. Nun podemos dexar que por culpa d’intereses partidistes irresponsables condenen a muerte a una llingua que pertenez al pueblu asturianu dende va más de mil años.

¡Agora ye’l momentu! Por eso, el prósimu llunes 14 d’abril convocámoste a les 11:00 a la concentración que va facese delantre la Xunta Xeneral. ¡Na reforma l’Estatutu, L’Asturianu Llingua Oficial!

----------------------------------------------------------
PER OTRU LLAU:
Fici un remocique del mio canal de youtube , nel qu'amás de camudar la estética punxi 3 estayes "Memoria d'Asturies"-Nel que xunto los vidios de les manifestaciones y actos que grabé-, "Música d'Asturies" - Na que voi faciendo una esbilla de la música del nuesu país- y la cabera que fixi "Asturies y la so llingua nos medios"-Pel momentu el mediu de comunicación d'onde saco los vidios ye TeleAsturias. Déxovos ún de güei sobre les Xornaes de Llingua y Educación de SUATEA: