Más de 100 delegaos de la coalición y miembros d'estremaos coleutivos, arroparán a los candidatos qu'UNIDÁ presenta pal 9-M al Congresu y al Senáu.

L'actu, que tendrá llugar de magar les 17.00 hores nel Auditoriu d'Uviéu cuntará cola intervención, ente otros, de los portavoces d'UNIDÁ, Germán Abad y Faustino Zapico, y los cabezaleros de llista al Congresu y al Senáu: Lali García ya Ignaciu Llope.

Asina, la formación qu'axunta a Izquierda Asturiana (IAS), Andecha Nacionaliega y Asturianistes, y que se presenta col envís de que nes eleiciones del prósimu 9 de marzu se sienta una voz "netamente asturiana, verde y d'izquierdes", presentará tamién el so programa, nel que rescamplen "la defensa d'un nuevu modelo de desendolcu pal país, frente al modelu actual que convierte Asturies nun basureru enerxéticu; la demanda d'un nuevu marcu políticu que reconoza'l calterr nacional d'Asturies y la oficialidá de la llingua asturiana; un sistema de financiación qu'asegure la viabilidá económica de los nuesos seutores productivos y el bientar social; y un apueste decidíu, énte les tentaciones represives que tamos viviendo n'Asturies, polos drechos civiles y la igualdá de sexos".

Nesti sen, UNIDÁ plantega que la so candidatura, a diferencia de les de PSOE, PP o IU, ye la única que namás se debe a los intereses del Pueblu Asturianu y que nun ta presa n'últimu términu de les decisiones que se tomen en Madrid por fuercies que se deben a dinámiques polítiques ayenes a Asturies.