La manifestación pola oficialidá d'esti sábadu, magar que'l Nuberu nun tuvo con nós y foi constante la presencia de la lluvia, cuntó cola asistencia de 20.000 persones según dixo'l voceru del Conceyu Abiertu pola Oficialidá. Con esa cifra, l'oxetivu ta más que cumplíu, facer d'esta la mayor manifestación pola oficialidá del asturianu qu'enxamás se fixere en tola hestoria del movimientu de vindicación llingüistica n'Asturies. Les marches dende estremaos puntos del país qu'entamaren yá a les 9:00 de la mañana, llevaron esti pidimientu per cuasi tola xeografía del país y espeya nidiamente'l rispir de la sociedá asturiana por que la so llingua nun quede escaecida nel prosimu remocique del estatutu d'autonomía, llei cimera del nuesu país, y qu'anecia en siguir reprimiendo y ñegando los drechos llingüisticos a los sos ciudadanos/es, de manes de los partíos parllamentarios que nél s'afayen PSOE,PP ya IX (partíu que mazcarase d'asturianista y que nun ye quien a llevar 20 persones a la mani).

Agora, como siempre, queda en manes de la clas política, esa clas política que nun respeta al pueblu nesta mal llamada democracia y que coles declaraciones que fexo Javier Fernández (cabezaleru de la Federación Socialista Asturiana), el mesmu dia de la movilización, diciendo que: "«preservar la lengua asturiana está bien, pero glorificarla no» yá que pa él "«las raíces de la intolerancia están hincadas en la sobrevaloración de lo propio»" amuesa mui a les clares el so refugu a un diálogu sobre un problema que lleva más de 30 años sobre la mesa y que nun quieren ver.

H.oda-y a quien-y h.oda, el pueblu asturianu siguirá na cai glayando y puxando porque la nuesa llingua nun desapaeza.

¡L'ASTURIANU LLINGUA OFICIAL YÁ!

Video de la manifestación:

Video del discursu:

Un saludu.