Cuandu yes neñu namái faes escarabayos o dibuxos nella, que paecen nun tener xacíu. Pero yá cuentes con daqué indispensable, y que nún futuru habrás de tener bien desendolcáu, el maxín. Con elli faes de la to vida un xuegu, nel que lo bonu y lo malu entemécense. Nel to mundiu tou ye gayola y nun pasa'l tiempu.

Más sero, entames a desendolcar la to personalidá propio y demientres enllénesla de llercies, tristures, allegries y de tolo que se te pase pela tiesta, sienteste arrequexáu nún mundiu estrañu al que tienes qu'emprimar a enfrentate. Relacionesti cola xente, formes la to opinión y los tos gustos. Pero tamién sabes aislate, y dedica-y tiempu a la to fueya, na qu'entames yá a escribir dellos suaños que te prestarie persiguir. Pero con ellos has tar sollerte y preparáu, porque tamién son peligrosos.
Nun pues dexate llevar, ye ciertu qu'éstos son l'alitu de la vida ya ensin ellos nun sedríemos más que vexetales, pero asemeyen meyores de lo qu'en verdá son, un engañifu. Murniamente, los suaños se-y cumplen a perpoques persones y pue que tu nun seyas una d'elles, anque ye importante nun escaecelos, nun te sofites nellos. Intentes aprovechar el tiempu. Pero demientres el tamañu de la fueya va xorreciendo...

De xuru vas cometiendo erros pero de ti depende'l decatate d´ellos ya igualos o non.

Demientres, culturiceste, llees, sientes música, viaxes, faes dalguna llocura, conoces xente de toa triba, faes amigos, tienes novia, la dexes, tienes otra... Faes tolo afayadizu pa que la de to nun seya una, d'eses tantes, que tán cuasi vacies o que paecen repitíes.

En teniendo yá un cachu. Escribes ensin aparar, el tiempu yá nun cuerre tán despaciu comu de guah.e, y tienes munches coses que facer. De xemes en cuandu eches-y un güeyu a tolo que tienes escritu, revises erros y n'ocasiones igües si entá tas a tiempu, intentes nun perder el filu, nun t'estanques, enllenesla comu quieres, pero con xacíu, yá nun t'esmoleces si la to fueya ye asemeyada o non a la del que tienes al llau, nun pretendes invovar porque yá ta tou fechu, simplemente trates de ser tu mesmu.

Cuando les lletres enllenen una gran parte del espaciu qu'has de rellenar, nun escaeces que toles constituciones y tolos drechos del home, xurdieron d´una fueya en blancu, que daquién tuvo a bien rellenar, dando-y conteníu y xacíu. Decátesti de qu'anque namái seyan lletres, les lletres son testigues, con elles s'escríbi la hestoria, de les lletres xurdió la comunicación ente un sieglu y otru, ensin importar el tiempu trescurríu... Sabes que lo qu'escribes na to fueya ye más importante de lo que creyíes nún entamu.