PROVOCACIÓN NEL TíBET
Higinio Polo, historiador y escritor especializáu en política asiática, analiza los porgüeyos ocultos y la desinformación sistemática emplegada tres los disturbios producíos en Tíbet ente los siguidores del Dalai Lama y la Policía y l'Exércitu chinu.
La escelente campaña propagandística que dende va años fai'l Dalai Lama, un home bonal, pacíficu, amante de la democracia y de la llibertá del Tíbet, algamó confundir munches conciencies. En realidá, Tenzin Gyatso, como se llama'l Dalai Lama, ye'l caberu xefe espiritual d'una secta lamaísta que, tres la revolución comunista de 1949 en China, vio cómo llegaba la fin de los sos privilexos.
El Tíbet anterior a 1949 yera un territoriu onde los más de los sos habitantes yeren siervos; munchos, esclavos, que podíen ser inclusu vendíos, y onde la propiedá y la riqueza taben concentraes en manes d'una nobleza feudal y de los monxos de los monesterios. Los cambeos políticos que llegaron cola revolución camudaron dafechu l'escenariu y, yá en 1956, el Dalai Lama y la so corte encabezaron una rebelión escontra'l Gobiernu revolucionariu chinu, armaos y aidaos financieramente pola CIA norteamericana, insurrección que foi derrotada pol Exércitu Popular en 1959. Les víctimes, en dambos bandos, foron unes diez mil, non más d'un millón como desvergonzadamente caltien el Dalai Lama.
Enxamás nun hebo una “invasión china” del Tíbet, como repite'l “Gobiernu nel exiliu” del Dalai Lama, ente otres coses, porque l'altiplanu tibetanu yera territoriu chinu sieglos enantes de qu'esistieren tolos países europeos d'anguaño. El Dalai Lama encabezaba un réxime tan bonal que tenía estipulaes penes pa delitos que consistíen n'arrincar los güeyos a los condenaos, corta-yos los pies o les manes, y otros castigos asemeyaos. Aquel réxime sostúvose pol aislamientu del Tíbet, pola escayencia de la China imperial y pola aición de potencies imperiales como Gran Bretaña, que llegó a ocupar Lhasa. Dende la so derrota en 1959, el Dalai Lama establecíu nel norte de la India, “descubrió” la bondá de la democracia, y pasó a ser un peón estratéxicu en manes de Washington, que-y tien financiao y aidao diplomáticamente nel últimu mediu sieglu. Demientres los años ‘60, EEXX organizó y entrenó en téuniques guerrilleres y de sabotaxe, inclusu en territoriu norteamericanu, a grupos de tibetanos: hasta entamos de los años ‘60, esos grupos, los "khampas", que llegaron a tener enrolaos a cásique diez mil hombres, llanzaron regularmente ataques armaos nel interior de China dende les bases que teníen en Nepal: al empar, operaciones secretes de l'aviación norteamericana abastecíen d'armes y esplosivos a esos grupos.
La derrota de la insurrección de 1959, unida al nacionalismu y al irredentismu políticu d'anicios relixosos de los monxos, foi utilizáu n'estremaes ocasiones pa organizar campañes de acosu y de descréitu de China; la cabera, en marzu de 2008. Contrariamente a les informaciones tendencioses de la prensa conservadora internacional, les protestes y la ‘revuelta’ en Tíbet nun foron pacífiques, y entamaron nos monesterios tibetanos de Drepung, Ganden y Sera: tola provocación taba perfeutamente organizada. Los participantes na revuelta sumieron a Lhasa nel caos, incendiaron la compañía llétrica, dexando ensin lluz a la ciudá y organizaron un verdaderu pogromu racista escontra chinos han y comerciantes de la minoría musulmana que causó les víctimes ¡de les que depués la prensa internacional tien fecho responsable al Gobiernu chinu! Hai testimonios del llinchamientu hasta la muerte de dos ciudadanos chinos han por parte de monxos y mozos tibetanos, y sabemos que cinco moces morrieron amburaes por mor d'ún de los incendios provocaos polos monxos y grupos de tibetanos siguidores del Dalai Lama.
Contrariamente a las informaciones que nos llegaron, la Policía china nun foi quien a controlar el xabaz españíu de violencia, hasta'l puntu de que más de 200 policíes resultaron firíos, xunto a 400 civiles. Más de 400 comercios foron tamién saquiaos y amburaos, y lo mesmo ocurrió con siete escueles y seis hospitales, amás de decenas de vehículos. La mayoría de la población tibetana nun protagonizó esa aversión escontra chinos han y musulmanes: foi obra de los siguidores del Dalai Lama. Les víctimes finaron pol odiu y la destrucción y non pola aición represiva de la Policía china.
El momentu taba perfeutamente calculáu: la proximidá de los Xuegos Olímpicos enanta l'efeutu del nuevu focu de tensión pa Pequín, y, amás, la calculada política norteamericana de presión a China (l'únicu país que pue ser un rival pa Washington) va utilizar otres cartes p'acosar a China. Pequín sabe que'l progresivu fortalecimientu chinu tien puntos febles que, ensin dulda, van ser emplegaos por EEXX: Tíbet y el Dalai Lama, pero tamién los grupos islamistes de la rexón china de Xinjiang, que reciben escuros apoyos; asina como la posible creación d'una crisis en Taiwan, y inclusu la reactivación de la crisis nuclear na península coreana, toos na redolada de la República Popular china. Porque los fechos de Lhasa nun foron namás qu'una “revuelta” d'un pueblu oprimíu, sinón una provocación fríamente calculada, de la que'l Dalai Lama y Washington conocen tolos detalles.
Atopao en: Diagonal
Un saludu.
Esbilla
del.icio.us
VITY
