¿Cuáles son les razones p'afalar a tol Seutor Públicu del Estáu (los individuos han decidir pola so cuenta) a emplegar, producir y cultivar el Software Llibre?

1.- Ye meyor porque ye llibre y porque furrula. Los usuarios puen emplegar, estudiar, copiar y meyorar los productos nesta modalidá teunolóxica, ensin mayores restricciones.

2.- Nun permite'l pagu por llicencies d'emplegu. De fechu, desanicia'l conceutu pola falta d'ética qu'implica. Na práctica esto se torna en que, por exemplu, ye posible facer la infraestructura computacional d'una Universidá ensin tener que marafundiar les perres por pagos periódicos y de llicencies d'usu.

3.- Ye adautable a les necesidades y a los recursos disponibles na institución. Hai, de fechu, esperiencies institucionales na distribución de software a la midida que namái que son posibles na práutica gracies al calter llibre d'esti software. Amás, el costu d'actualización del mesmu en tola plataforma institucional ye mínimu pues y significaría un aforru considerable n'anchu de banda de conexón a Internet.

4.- La incidencia de los virus computacionales nes plataformes llibres ye cásique nenguna. Magar qu'esistiera dalguna menacia per esa vía, la comunidá organizada del software llibre tien daes amueses d'una nidia dimposición y una sorprendente capacidá pa retrucar a eses menacies.

5.- Ye perbono pal enseñu y p'afalar el desendolque teunolóxicu d'una nación.

6.- Delles instituciones tienen yá capacidá p'afitar y caltener un sistema de soporte a usuarios de la mesma institución. Esto podría emplegase pa suplementar l'apoyu a otres instituciones con necesidaes asemeyaes.

7.- Caltien rellación colos Estándares Teunolóxicos Abiertos. Los estándares abiertos son pernecesarios nel allugamientu de la memoria institucional (tol estoyu documental, formal y informal, alministrativu y académicu) porque permite recuperar datos, información y conocimientu ensin tar veceyáu a intermediarios forciosos.

8.- Yá ye política pública nacional en dellos países. En Venezuela dende'l 23 d'Avientu de 2004, data na que foi promulgáu'l Decretu 3390 qu'establez l'usu prioritariu de Software Llibre na alministración público nacional, amás de Brasil, Ecuador y n'otros países del mundu desendolcáu (como Suráfrica).

9.- Afalaga l'andecha y la solidariedá. Les comunidaes de Software Llibre rescamplen pola so increyíble productividá coleutiva.

Pero ¿Por qué estes razones nun calistren?

Testu orixinal de Jacinto Dávila. Tornáu y resumíu por fueyaenblancu.

Un saludu.

Etiquetas: Software Llibre

Gustavo Roig / Madrid
El pasáu 30 de xineru dio'l pistoletazu comercial el nuevu sistema operativu de Microsoft, Windows Vista, que requier d'un hardware más potente y más caru, y enconta'l control de los sistemes anticopia.

Windows Vista ye daqué más qu'un sistema operativu qu'ha tener una fonción básica y esencial: tomar el control sobre'l hardware o, meyor dicho, garantizar a otros programas l'accesu a dispositivos como los discos duros, puertos, tarxetes de rede o de soníu, tarxetes gráfiques, tecláu y ratón, ente otros.

El caberu "gran productu" de Microsoft, qu'asoleyó'l mercáu con una pergrande campaña de propaganda mundial sofitada ‘informativamente’ polos cimeros medios de comunicación hespañoles, ye un dispositivu empobináu a remanar el comportamientu del usuariu. La so política de ‘proteición de conteníos ya informática fiable’ (trusted computing) ye un conxuntu de teunoloxíes diseñaes pa forciar a los usuarios a cumplir los drechos de copia (copyright) impuestos pola industria d'arruelu sobre música, vídeos, programes, xuegos o llibros. Esti manoxu de llimitaciones téuniques, conocíu como DRM (Digital Right Management o Xestión de Drechos Dixitales), definelu'l distribuyidor de la industria audiovisual y consiste n'afitar custiones tales como cuántes vegaes ha de vese un vídeo, quién pue velu, cuántes copies se puen facer y en qué condiciones. Tou ello depende de cuánto se tenga pagáu pol vídeo.

Windows Vista s'encarga de qu'esto se cumpla al traviés de lo que denoma teunoloxía PVPOMP (Protected Video Path - Output Protection Management). Esta teunoloxía desautiva ciertes salíes d'audio y vídeo de los ordenadores en casu de deteutar reproductores que nun soporten les llimitaciones impuestes poles DRM al usuariu. Vista amenorgará la calidá d'imaxe o deshabilitará'l reproductor de vídeo si ésti nun foi diseñáu pa caltriar les llimitaciones impuestes pol distribuyidor del vídeo. Los nuevos soportes d'alta calidá y capacidá d'almacenamientu como HD-DVD o Blue-ray vense afeutaos dafechu por esti sistema. Gracies a la collaboración d'Intel con Microsoft, el nuevu hardware ha d'asumir estes nueves teunoloxíes de control pa ser compatibles col nuevu Windows.

Nel mesmu intre en que se llanza Vista, Apple, ún de los grandes del hardware de reproducción de música da p'atrás y defende la elliminación d'esi tipu de teunoloxía anticopia. Ye más, lo que diz el so presidente, Steve Jobs, parte pola metá'l modelu Microsoft: “Maxina un mundiu onde les tiendes online vendieren música llibre de DRM, en formatos abiertos. Nun mundiu como éstu, cualaquier reproductor podría reproducir música alquirida en cualaquier tienda, y cualaquier tienda podría vender música que, a la so vez, podría ser reproducida en cualaquier reproductor. Ésta ye la meyor alternativa pa los consumidores”.

Esti conxuntu de tarees qu'asume'l nuevu sistema va xenerar grandes cambeos na industria del hardware. Per un llau, bona parte de los equipos n'usu a día de güei nun van reunir los requisitos mínimos pa poder instalar Vista (un procesador, como mínimu, a 800 MHz, 512 MB de memoria RAM, tarxeta gráfico compatible con DirectX9) y, si lo faen, el so rendimientu sedrá inferior al respeutive de los sistemes actuales. El microprocesador d'un PC con Vista necesita facer un esfuerciu superior al doble del que se fae baxo Windows XP o GNU/Linux, al tener qu'encriptar y desencriptar los bits que cuerren pelos ‘buses de datos’ de la placa bas o los cables que coneuten a los reproductores multimedia. Esta tarea, que nun ye nin básica nin esencial, poco tien que ver coles necesidaes téuniques reales requeríes a un sistema operativu. Respuende a cálculos económicos. A curtiu plazu, el hardware que se diseñe pa Windows Vista habrá ser más potente y más caru, pero nun sedrá necesariamente más rápidu.

Esta converxencia estratéxico ente la industria del hardware, Microsoft y los ‘cruzaos del copyright’ de la industria multimedia, da como resultáu un enxendru que pon baxo sospecha a tou usuariu y lu somete a les lleis más agresives que, n'esti sen, s'escribieren nunca, como la Digital Millennium Copyright Act norteamericana. Esta llei, seña d'identidá de l'Alministración estaunidense, que persigue la infracción del drechu de copia y conderga especialmente la producción de teunoloxíes que permitan saltase la xestión de los drechos dixitales. Ye la ‘bas espiritual’ del nuevu sistema.

El desendolque d'esta tendencia perfila un escenariu braeramente peligrosu pa cualaquier sistema alternativu: un tipu de hardware hexemónicu nel qu'instalar un solu tipu de sistema operativu, conteníos multimedia sólo reproducibles en sistemes operativos propietarios; nuevos estándares pa la web y documentación incompatibles fora del universu Windows.

(estrayíu del Periódicu Diagonal http://www.diagonalperiodico.net/article3131.html, baxo una llicencia Creative Commons)

Etiquetas: Software Llibre