Anasagasti Rules
EL MONTAXE DE LOS "PREMIOS PRINCIPE DE ASTURIAS"
Ví'l vienres en direutu per Euro News la llegada de la reina Sofía y de Felipe y Letizia al Teatru Campoamor pa la entrega de los "Premios Príncipe de Asturias".
Nun duldo qu'esta aniciativa proyeuta la imaxe d'Asturies pero nun veo n'ella a la tierra brava y dura, minera y socialista, a la de la revolución d'ochobre y a la de Belarmino Tomás, proyeutada al sieglu XXI. Veo una imaxe adulzada a mayor gloria de la monarquía española con un montaxe efeutista, pero falsu.
Porque los Premios son fáciles si tres d'ellos tienen una máquina como la que tienen estos Premios. Porque estos premios nun se dan a quien entama sinón namás qu'a los consagraos. La fórmula pos ye fácil. ¿Quién ye'l meyor o'l que más sona nel mundu del Deporte, de la Lliteratura, de l'Animación Internacional, de la Economía y de cualquier otra actividá?. Pos se-y da a esi presidente, a esi actor, a esi Woody Allen, a esi Bill Gates, a esi Schumacher, a esi Gore, a quien seya, pero que sone y si sona munchu y si vien a recoyer el Premiu, "miel sobre hojuelas".
Pero eso sí.
El centru de tol actu nun son los premiaos. Non, eso non. Esos son l'atrezzo. El centru de too ye Felipe de Borbón y agora, Felipe y Letizia. Como sonrín, como visten, si ta preñada o non, si diz nun se que cosa, ye dicir, superficialidaes en ringlera, arodiaes de gran oropel, convidaos de lluxu, medio gobiernu socialista y munchu maruxeríu.
L'éxitu pos ta aseguráu. La idea ye perbona, si per detrás hai amás una inversión millonaria.
Nin una sola crítica, nin un mal xestu, nin una alfombra ensin limpiar. Tou perfeutu a mayor gloria de la continuación de la triba monárquica. Un negociu redondu.
Por exemplu. Vi en direutu la entrega d'ún de los Premios al Direutor del Museu del Holocaustu en Xerusalem. Enantes tienen pasao varies víctimes del ghetto de Varsovia y de campos de concentración nazis d'esterminiu y de la llista de Schindler. Foi emocionante ver a xente vieyo, col tatuaxe del so númberu nel brazu, dir a recibir una reconocencia. Quiciás foi'l momentu más emotivu. Y nun lo critico. Aplaudolo. Pero los "Premios Príncipe de Asturias", si de verdá foren galardones pa premiar trayeutories nun teníen que dir tan lloñe. Fasta que yo nun vea que premien a supervivientes republicanos de la construcción del Valle de los Cayíos, del bombardeu de Gernika, de los miles d'encarcelaos, de los cures persiguíos y aventaos pol franquismu, de los campos de trabayu, siguiré pensando qu'estos Premios tán fechos namás que pa la meyor gloria de la pareya principiega. Y, eso pa l'aguerrida Asturies, nun dexa de ser daqué impropiu de la so heroica hestoria.
Torna fecha por: Fueyaenblancu
Fonte: Blogue d'Anasagasti
Esbilla
del.icio.us
VITY
