Fer ye un mozu asturianu militante d'estremaos coleutivos (sociales, políticos y sindicales) que fuera deteníu'l día 13 de setiembre de 2005 baxo acusación d'atentáu. A Fernando, acusáu pola Policia Española de portar dos petardos, dos aerosoles y 5 llitros de gasolina, aplicaeren-y la llei antiterrorista. Recluyíu na cárcele de Navalcarnero (Madrid), adoleció l'ensañamientu de medios de comunicación, per aciu d'un xuiciu paralelu que-y facía responsable de 18 atentaos ensin resolver dende 2001 y atribuyendo-y conexones con estremaos grupos terroristes, y l'Estáu, cola aplicación de lleis d'esceicionalidá inxustificades y arbitraries.

Tres más de 100 díes na cárcele Fer salió baxo fianza de 10.000 € el 23 d'avientu dende esi mesmo añu, tando pendiente, hasta agora, la igua del procesu xudicial.

La xusticia española vuelve citar a Fer pa un nuevu interrogatoriu que se fadrá a les 9:30 hores el prósimu xueves 12 de xunu nel Xulgáu Central d'istrucción númberu 6 de l'Audiencia Nacional Española en Madrid, esto, según camienten dende Sofitu, supón que'l pidimientu penal del fiscal sedrá enforma alto.

Otramiente, la policía conceyil xixonesa vien de mandar al desguace'l coche que la policía española quitára-y a Fer nel intre la so detención, y que darréu abandonara precintáu nuna cai de Xixón. La Casa Conceyu reclamaba a Fer más de 2.400 € en conceutu de depósitu de grúa, y nun esperó a que prosperasen los trámites xudiciales entamaos p'aclarar unos problemes de comunicación ente l'Audiencia española y l'acusáu na dilixencia qu'informaba del desprecintu del coche y puesta a disposición de Fer.
----------------------------------------------------------------
Apúrrovos dos documentos pa recordavos la que se viviera daquella:

Videu d'una de les manis en Xixón pola so llibertá:

Entrevista a Fer tres la so salida de la cárcele:

Daquella la contrainformación n'asturianu na rede nun taba tan estendida y la blogosfera asturiana nun esistía, poro, nun había tantos medios pa esparder la noticia... ¡collabora informando d'esti casu y de les vinientes convocatories!

Pa más información:
*¡Fer Llibertá!
*Sofitu

Un saludu.

El pasáu domingu, 25 de mayu, los compañeros andaluces asistieron a un nuevu actu d'humillación y represión hacia'l Pueblu Andaluz.

Demientres l'alcuentru que disputaben el Cádiz Club de Fútbol escontra'l Gimnastic de Tarragona, na grada de Fondu Sur del estadiu los aficionaos cadistes entonaben l'himnu nacional d'Andalucía, dos mozos andaluces foron prindaos pola fuercia, deteníos, golpeaos y insultaos poles fuercies de represión del Estáu español; el motivu de tala aición nun yera otru que'l portar una bandera d'Andalucía, que sigún ellos afala la violencia. Los deteníos foron llevaos a rastres ente pataes de la policía, foron llevaos a comisaría onde los dexaron incomunicaos y foron victimes de la violencia policial. Yá minutos primero, a dellos andaluces quitaren-yos les sos banderes andaluces por parte de la policía baxo menacia de multa. Los aficionaos cadistes, en solidaridá colos deteníos abandonaron la grada en forma de protesta p'amosar el so refugu a la represión a la que tán siendo sometíos ciertos seutores pol simple fechu de sentise andaluces.

Casos como esti nun son los primeros qu'asoceden, yá nel partíu últimu de la seleición nacional andaluza la policía requisó varies pancartes y banderes con lemes de sofitu al país andaluz y que, una vegada más, paez que mancaba y incitaba a la violencia de los españoles. ¿Sentise arguyosu de ser andaluz y reclamar los derechos del to país ye una incitación a la violencia? La única violencia que se tien vista ye la policía en nome d'España. Adulces, paez más fácil que vuelvan ocurrir casos como los de Blas Infante (1) o Manuel Caparrós (2) ente otros, achuquinaos pol simple fechu de sentise andaluces.

Ta coartandose la llibertá d'espresión del mesmu mou que se facía va poco más de 30 años. Nun se pue entender el mieu qu'hai a dexar que los pueblos (nesti casu l'andaluz) s'espresen llibremente, paece que namás-yos val que nos sintamos españoles si o si.

Por eso, denunciamos al Estado español como Estado fascista, donde ser andaluz se ha convertido en un crimen, y a la policía como su brazo represor.

Los deteníos, enfréntese agora a una multa de 3.000 euros.

¡Valió de represión!
¡Puxa Andalucía Llibre y Socialista!

(testu tornáu del comunicáu qu'asoleyó Jaleo!!!)

Notes:

(1)Blas Infante
Consideráu “Padre de la Patria Andaluza e ilustre precursor de la lucha por la consecución del Estatuto de Autonomía para Andalucía”.

(2) Manuel Caparrós
Yera un trabayador y militante de Comisiones Obreres, que'l 4 d'avientu de 1977 morrió d'un disparu fechu pola policia mientres intentaba alzar una bandera andaluza nel ayuntamientu de Málaga nuna mani pro autonomía.

85.000 euros. Ésta ye la cantidá que-yos podríen imponer de multa a dos trabayadores de les piscines municipales d'Avilés y al sindicato CSI. La Plataforma contra la Represión y por las Libertades anuncia que ye un intentu de criminalizar les protestes llaborales.

El motivu de la querella ye'l reparto d'una fueya na que se denunciaben los planes de privatización de les piscines municipales d'Avilés.

La plataforma organizará una manifestación el próximu 10 de xunu n'Avilés pa intentar algamar que se retire la denuncia.

Un saludu.

La rescamplada lluchadora y activista mapuche Patricia Troncoso, que tien cumplíos más de 100 díes en fuelga de fame en protesta poles condiciones carcelaries infrahumanes que enfrenta, ta "en riesgu vital", acordies coles declaraciones emitíes por personal médicu.

Troncoso cumple una condena a 10 años de presidiu nel marcu de la llei antiterrorista de la dictadura, que se-y impunxo pola so presunta participación nel incendiu d'una facienda forestal nun xuiciu carente de toles garantíes xudiciales pertinentes.

Los médicos de la Xendarmería, magar que tienen los informes sobre la gravedá de la comunera, caltienen a la muyer nuna sala onde nun hai monitoreu cardiovascular nin equipu de reanimación y ta prauticamente incomunicada.

Ye de recamplar amás que'l pá de l'activista mapuche interpunxo'l xueves pasáu na Corte d'Apelaciones de Santiago un recursu d'amparo escontra la Presidenta Michelle Bachelet. L'abogáu venceyáu a casos de drechos humanos Hugo Gutiérrez, afirmó nos tribunales que, nel casu de la fuelga de fame de Troncoso, la "responsabilidá cabera de lo que ta pasando cola so situación de salú y cola so integridá física ye d'un gobiernu que nun toma decisiones pa iguar la problemática colos prisioneros mapuches, y ensin dulda que la responsabilidá cimera ye de la Presidenta de la república".

Lo ciertu ye que nel Chile del cogobiernu ente Concertación y Alianza por Chile, nun hai voluntá política pa resolver les demandes ancestrales de los pueblos orixinarios chilenos.

Mentanto dende estremaos llugares del mundu realicense xornaes de denuncia y solidariedá pa cola causa de los pueblos orixinarios chilenos, énte un Estáu y Gobiernu que se ñega a facer respetar los drechos humanos que-y son conculcaos al pueblu mapuche dende va sieglos.

Dende fueyaenblancu tola mio solidariedá pa con Patricia Troncoso y el pueblu Mapuche.

Un saludu.

El xuez inculpa por un delitu de resistencia al secretariu de l'Agrupación de Vecinos y Amigos de Llanes (AVALL), Domingo Goñi Tirapu.

N'Asturies tán pasando dende va años coses mui rares. Persíguese la opinión llibre, zarrense medios de comunicación, espulsase a los militantes de los partíos políticos que discrepen, encarcelase a los sindicalistes qu'estorben, atacase violentamente a los periodistes que nun entren na rueda. Tou baxo un fonderu silenciu. Ye como si se tuviere produciendo una auténtica mutación autoritaria de sistema, con una aparente indiferencia, condicionada pola actitú de collaboración de les empreses periodístiques con estos devaneos autoritarios del poder políticu.

Agora tenemos otru ciudadanu inculpáu, el secretariu de l'Agrupación de Vecinos y Amigos de Llanes (AVALL), Domingo Goñi Tirapu, por un presuntu delitu de resistencia a l'autoridá y poles supuestes faltes de perturbación del orde públicu, mancadures a un policía local y maltratu d'obra al tener que ser desaloxáu d'un plenu municipal por orde de l'alcaldesa del Partíu Socialista por llevar una camiseta cola inscripción de “La Talá es ilegal”, referida a una urbanización de Llanes.

L'Agrupación de Vecinos y Amigos de Llanes (AVALL), ta desendolcando una llucha escontra la especulación siendo ésta una de les poques entidaes cíviques que defende l'interés xeneral énte l'avance imparable de los negocios impulsaos pola clas política.

Fonte: Asturias Verde

Un saludu.

Etiquetas: Llibertá d'espresión

Rétulu billingüe del Tribunal Cimeru de Xusticia

Milenta vegaes el PSOE n'Asturies amosó que nun ta al favor del asturianu, ye más, quier el so desaniciu y facer un país que fale dafechu castellán. Siempre se quexen de lo caro que sedría caltener el billingüismu y promocionar l'usu y espardimientu de la llingua, magar qu'aprobaron una llei nesi sen, o defenden que si l'asturianu ye oficial va imponese a tola sociedá, tán engañando a la xente y pesie a eso dieranse dellos pasinos en cuantes a retulaciones nes conseyeries del "Principado", pero agora, les conseyeries de bientar y xusticia quiten esos rétulos basandose en que (afarraivos) l'asturianu nun ye llingua oficial d'Asturies...

Ye dicir, cartelos que yá taben pagos, que namái que facien que respetar los idiomes falaos nesta tierra son desaniciaos por mor de qu'a los conseyeros de turnu da-ys vergoña o igual-yos manca a los güeyos ver "Gobiernu del Principáu d'Asturies" en cuenta del tan cultu, refináu y español "Gobierno del Principado de Asturias".

En fin otru pasín p'atrás depues de 30 años de vindicación llingüística...y escosase'l tiempu.

Noticia estrayida de La voz de asturias

Un saludu.

Etiquetas: Artículos blancos, Llingua

Imaxe de la sé na presentación de la xunta executiva del conceyu

Como vien faciendo "fueyaenblancu" con casos de represión o de falta de llibertaes colos qu'amosó solidariedá, dende esti blogue tornase a denunciar un ataque a la llibertá nesti país, esta vez trátase de repetíes estroces na sé d'IAS (partíu que forma parte d'UNIDÁ) na ciudá de Xixón.

Foron trés yá les veces qu'esta sé sofrió ataques, esta última foi la frañidura con piedres de la so la luna, Pablo Rodríguez (cabezaleru del partíu en Xixón) declaró que “de va unos meses p'acá'l nuesu local de Xixón ta sufriendo una riestra d'ataques que van xubiendo en gravedá”. Nesti sen Rodríguez Alonso fexo una un recordatoriu de lo asocedío hasta'l momentu, “primero enllenáronnos la fachada del local con pegatines de l'asociación“N'AST”, tres d'esto frayáronnos un cristal de la puerta, poco depués de les elecciones del 27 de mayu ficiéronnos una pintada na que se lleía “Traidores” y finalmente esta fin de selmana'l llanzamientu de varies piedres frayó dafechu la luna del local”. El portavoz dio anuncia de qu'estos fechos “tán denunciaos a la policía pa intentar identificar a los responsables d'estos ataques, y ye que n'IAS camentamos que nun son ataques casuales yá que la so premeditación y que paezan tar rellacionaos cola participación d'Izquierda Asturiana na coalición UNIDÁ, faenos pensar que tamos sufriendo les 'represalies' de persones que nun tienen y nin conocen otra manera d'actuar que la violencia más estúpida”.

Pa finar Pablo Rodríguez quixo dexar claro que “por supuesto nun vamos dexar qu'un cogollín de descerebraos torguen el trabayu futuru que tien que desendolcar IAS y UNIDÁ.

Esperemos qu'esto nun vuelva asoceder y que los collacios d'IAS puean siguir desendolcando'l so trabayu.

Un saludu.

Etiquetas: Unidá

Depués de tol enguedeyu formáu arriendes de l'anterior portada de la revista humorística "El Jueves" y que fexo que se viera los medios represivos del poder estatal al traviés de la policía que secuestró los númberos a la vienta. La revista da marcha antrás y reutifica la so postura espublizando una nueva portada d'esi númberu. Paez que van siguir "tocando los borbones" un tiempu...

Un saludu.

Etiquetas: Llibertá d'espresión

El xuez de l'"Audiencia Nacional", Juan del Olmo, ordenó -a pidimientu de la Fiscalía- que se retire de los quioscos l'últimu númberu de la revista satírica "El Jueves" (la ueb yá ta pesllada) por un supuestu delitu d'inxuries a la Corona.

El nuevu númberu amuesa na so portada, tovía visible na ueb de la revista, la caricatura de los Príncipes d'Asturies nuna postura sexual esplícita que foi calificada como "irreverente". La imaxe amuesalos faciendo la postura del "perrín" y xunto a un testu con lletres de gran tamañu en bermeyu que diz: "2.500 euros por neñu", faciendo alusión a l'aída que'l Gobiernu concederá a les families de los neños que ñazan de magar agora.

"¿Te das cuenta? Si te quedas preñada... ¡Esto va a ser lo más parecido a trabajar que he hecho en mi vida!", diz el personax que representa al Príncipe na viñeta.

La imaxe namái apaez na portada de la revista. El xuez tien pidíu que se destruya'l so molde pa que nun se reproduza otra vuelta.

La Constitución española prohíbe la censura previa d'espublizaciones, pero sí permite'l secuestru d'estes a posteriori si un xuez determina que vulnera ciertos drechos fundamentales.

Según l'autor de la viñeta; "Yo a quienes he dibujado es a Tom Cruise y Katie Holmes, no sé porque la gente piensa que son los que son. Nadie ha dicho que sean quienes dicen que son. El juez Del Olmo lleva gafas, se pone colirio, y quizá ha confundido el tema".

José Luis Martín (editor de "El Jueves" fala sobre'l secuestru a la revista:

¡POLA LLIBERTÁ D'ESPRESIÓN FUEYA EN BLANCU CON "EL JUEVES"!

Un saludu y gracies a Iyán por apurrime la noticia estrayida de "20 Minutos"

Etiquetas: Antiglobalización, Anuncies, Llibertá d'espresión

Riopedre reafirma la so voluntá d’afitar la marxinación del asturianu na enseñanza. El conseyeru d’Educación, Jose Luís Iglesias Riopedre, afirmaba nuna entrevista a un diariu asturianu la so voluntá de que la llingua asturiana siga calteniendo una presencia marxinal nel sistema educativu, mui pembaxo incluso de lo que manda la Llei d'Usu.

COMUNICÁU:
Na reforma del Estatutu, la FSA tien qu’escoyer ente les llibertaes o la represión.
Depués de les declaraciones feches pol Conseyeru d’Educación, Riopedre, la Xunta pola Defensa de la Llingua Asturiana quier garrar los mesmos argumentos que manexa y volvé-ylos a él y al so partíu. Pide Riopedre un gobiernu qu’estableza llazos de fierro cola sociedá. Y nós pidímos-y que lo faiga. La sociedá, como dexen claro los estudios sociolóxicos, nun ve nengún problema nin peligru a la oficialidá: velo como daqué natural y paez-y normal que la nuestra llingua tenga’l mesmu reconocimientu que les demás del estáu. Neso, la cúpula dirixente de la FSA va al revés que la sociedá y, mesmamente, que’l so partíu n’otres comunidaes. Tamos enfotaos en que les bases van acabar faciendo entrar en razón a los intransixentes que dirixen el partíu y que lo único de fierro que quieren establecer ye la censura llegal a los falantes d’asturianu.

Resulta abondo esmolecedora ver nestos díes la priesa de los cabezaleros y cargos políticos socialistes por dar por zarrada cualquier posibilidá de reconocimientu de derechos llingüísticos que nun sían los que yá tienen los castellanofalantes.

L’exemplu más claru ta nes declaraciones de Riopedre al negar que l’asignatura d’asturianu pudiere ser voluntaria y non optativa na educación secundaria. Lo que más lu preocupa ye perxudicar a los estudiantes que nun escueyen l’asignatura, porque son mayoría. Escaez el Sr. Conseyeru qu’eses cifres son responsabilidá directa de la so xestión: nuna situación de discriminación llegal, teniendo que competir con otres asignatures, con munchos equipos directivos en contra, con un desdexamientu claru de l’Alministración... y tovía fala, cuasi con despreciu, d’esa «minoría» de 4.000 alumnos qu’escueyen l’asignatura.

Fala Riopedre de consensu ampliu na reforma estatutaria, pero pide a los defensores de la oficialidá que renuncien a lo que lleven pidiendo dende va trenta años pa llegar a esi consensu. Nós plantegámos-ylo d’otra manera: escueya ente reprimir a los que piden derechos o dar llibertaes pa qu’use l’asturianu quien quiera. Cola primer opción, unos sufren discriminación; cola segunda, toos tienen derechos llegales. ¿Qué acuerdu será meyor: el que da llibertá o’l que reprime? Diz el Sr. Riopedre que cuando se negocia naide tien que quedar como vencedor nin como vencíu. ¿Cómo quier que se sienta’l ciudadanu que quier usar l’asturianu y l’alministración niégalo porque nun ye oficial? ¿Paez-y al Sr. Riopedre qu’esi ciudadanu ensin derechos democráticos va sentise vencedor? Duldamos muncho de la condición de demócrata de quien fala con esi despreciu de la reclamación de derechos, qu’eso ye, y non otra cosa, la oficialidá.

La Xunta pola Defensa de la Llingua Asturiana fai un llamáu a tolos sectores democráticos d’Asturies pa que tean preparaos pa movilizase namás qu’empiecen los trabayos de reforma del Estatutu d’Autonomía. Nun vamos dexar que los intransixentes amagüesten un Estatutu que niegue derechos democráticos. Por muncho que la neciura contra l’asturianu y el provincianismu ranciu quieran condenar al nuestru patrimoniu llingüísticu a la desapaición, por muncho que quieran neganos un derechu qu’otros ciudadanos del estáu sí tienen reconocíu, vamos dexa-yos claro que tamos dispuestos a lluchar: democráticamente, cola razón y el diálogu, movilizándonos, faciendo ver a tola sociedá que yá ta bien de vivir nuna comunidá con un déficit democráticu inalmisible. Na reforma del Estatutu los partíos políticos qu’hasta agora tuvieron sordos y ciegos a la reclamación de derechos llingüísticos tienen que facer un exerciciu de responsabilidá histórica qu’hasta agora nun fixeron. Vamos esixilo porque ye de xusticia. Un Estatutu ensin oficialidá ye un Estatutu antidemocráticu y represor y eso nun ye bono p’Asturies nin pa los asturianos.

Xunta pola Defensa de la Llingua Asturiana

Miércoles 18 de xunetu de 2007.

Un saludu.

Etiquetas: Llingua