Riopedre reafirma la so voluntá d’afitar la marxinación del asturianu na enseñanza. El conseyeru d’Educación, Jose Luís Iglesias Riopedre, afirmaba nuna entrevista a un diariu asturianu la so voluntá de que la llingua asturiana siga calteniendo una presencia marxinal nel sistema educativu, mui pembaxo incluso de lo que manda la Llei d'Usu.
COMUNICÁU:
Na reforma del Estatutu, la FSA tien qu’escoyer ente les llibertaes o la represión.
Depués de les declaraciones feches pol Conseyeru d’Educación, Riopedre, la Xunta pola Defensa de la Llingua Asturiana quier garrar los mesmos argumentos que manexa y volvé-ylos a él y al so partíu. Pide Riopedre un gobiernu qu’estableza llazos de fierro cola sociedá. Y nós pidímos-y que lo faiga. La sociedá, como dexen claro los estudios sociolóxicos, nun ve nengún problema nin peligru a la oficialidá: velo como daqué natural y paez-y normal que la nuestra llingua tenga’l mesmu reconocimientu que les demás del estáu. Neso, la cúpula dirixente de la FSA va al revés que la sociedá y, mesmamente, que’l so partíu n’otres comunidaes. Tamos enfotaos en que les bases van acabar faciendo entrar en razón a los intransixentes que dirixen el partíu y que lo único de fierro que quieren establecer ye la censura llegal a los falantes d’asturianu.
Resulta abondo esmolecedora ver nestos díes la priesa de los cabezaleros y cargos políticos socialistes por dar por zarrada cualquier posibilidá de reconocimientu de derechos llingüísticos que nun sían los que yá tienen los castellanofalantes.
L’exemplu más claru ta nes declaraciones de Riopedre al negar que l’asignatura d’asturianu pudiere ser voluntaria y non optativa na educación secundaria. Lo que más lu preocupa ye perxudicar a los estudiantes que nun escueyen l’asignatura, porque son mayoría. Escaez el Sr. Conseyeru qu’eses cifres son responsabilidá directa de la so xestión: nuna situación de discriminación llegal, teniendo que competir con otres asignatures, con munchos equipos directivos en contra, con un desdexamientu claru de l’Alministración... y tovía fala, cuasi con despreciu, d’esa «minoría» de 4.000 alumnos qu’escueyen l’asignatura.
Fala Riopedre de consensu ampliu na reforma estatutaria, pero pide a los defensores de la oficialidá que renuncien a lo que lleven pidiendo dende va trenta años pa llegar a esi consensu. Nós plantegámos-ylo d’otra manera: escueya ente reprimir a los que piden derechos o dar llibertaes pa qu’use l’asturianu quien quiera. Cola primer opción, unos sufren discriminación; cola segunda, toos tienen derechos llegales. ¿Qué acuerdu será meyor: el que da llibertá o’l que reprime? Diz el Sr. Riopedre que cuando se negocia naide tien que quedar como vencedor nin como vencíu. ¿Cómo quier que se sienta’l ciudadanu que quier usar l’asturianu y l’alministración niégalo porque nun ye oficial? ¿Paez-y al Sr. Riopedre qu’esi ciudadanu ensin derechos democráticos va sentise vencedor? Duldamos muncho de la condición de demócrata de quien fala con esi despreciu de la reclamación de derechos, qu’eso ye, y non otra cosa, la oficialidá.
La Xunta pola Defensa de la Llingua Asturiana fai un llamáu a tolos sectores democráticos d’Asturies pa que tean preparaos pa movilizase namás qu’empiecen los trabayos de reforma del Estatutu d’Autonomía. Nun vamos dexar que los intransixentes amagüesten un Estatutu que niegue derechos democráticos. Por muncho que la neciura contra l’asturianu y el provincianismu ranciu quieran condenar al nuestru patrimoniu llingüísticu a la desapaición, por muncho que quieran neganos un derechu qu’otros ciudadanos del estáu sí tienen reconocíu, vamos dexa-yos claro que tamos dispuestos a lluchar: democráticamente, cola razón y el diálogu, movilizándonos, faciendo ver a tola sociedá que yá ta bien de vivir nuna comunidá con un déficit democráticu inalmisible. Na reforma del Estatutu los partíos políticos qu’hasta agora tuvieron sordos y ciegos a la reclamación de derechos llingüísticos tienen que facer un exerciciu de responsabilidá histórica qu’hasta agora nun fixeron. Vamos esixilo porque ye de xusticia. Un Estatutu ensin oficialidá ye un Estatutu antidemocráticu y represor y eso nun ye bono p’Asturies nin pa los asturianos.
Xunta pola Defensa de la Llingua Asturiana
Miércoles 18 de xunetu de 2007.
Un saludu.
Etiquetas: Llingua
Esbilla
del.icio.us
VITY
