La Federación de Balonmanu d'Asturies cumple 50 años y, pa cellebralu, fadráse n'Avilés un partíu qu'enfrentará a les seleiciones d'España y Asturies, lo que supón el primer partíu d'esti calter n'Asturies.

El partíu celebrarase'l 29 d'avientu y entá queden pendientes dellos aspeutos organizativos, magar que de xuru que sedrá organizáu de mena españolista como una rexón escontra un país pero nun podemos dexar la oportunidá de ver esi partíu y animar a Asturies como lo que ye, un país con toles lletres.

Un saludu.

Heroes ye la primer serie cola entama esti blogue en "fas de prebes".

Col envís d'enanchar la variedá de conteníos n'asturianu na rede dende "fueyaenblancu" propongovos un nuevu proyeutu, onde toos podeis participar.

Nómase "Series n'ast" y tien como finxu cimeru l'ofrecimientu de series sotitulaes al asturianu pal esfrute de toos. La razón d'entamar cola segunda temporada d'Heroes ye, qu'amás de prestame la serie, esta entá nun llegó en castellán a les nueses pantalles y paezme un lluxu poder esfrutar d'una serie n'asturianu ensin tener qu'esperar a que la doblen, obviamente, en castellán. Pero nun futuru tamién podriemos entamar con series yá doblaes o inclusu atrevenos con dalguna película, too depende del nivel de participación qu'alquiera'l blogue, yá que como podrein entender too esto nun lo pue llevar una sola persona.

Un saludu.

Etiquetas: Anuncies, Llingua

Baxo'l lema "Asturies SÍ ye nación" la federación de partíos UNIDÁ va celebrar l'ochu de setiembre n'Avilés. Nun comunicáu la federación nacionalista señala que "pretendemos afirmar el 8 de setiembre como una xornada de reivindicación nacional asturiana y recordaremos la necesidá d'un modelu de financiación axustao a les nueses necesidaes, de la oficialidá de la llingua asturiana y d'un modelu de desarollu sostenible pal país".

Los actos d'UNIDÁ van consistir, sigún la nota de prensa ellaborada pola Xunta Coordinadora de la federación, nun "mitin políticu a les 13 hores na cai del Sol nel qu'intervendrán representantes d'UNIDÁ, tanto a nivel nacional como local, y nel que va contase cola participación de colectivos sindicales y sociales con presencia n'Asturies y nel que se recordará especialmente la efeméride del 70 aniversariu de la proclamación de la soberanía por parte del Conseyu Soberanu", asina como "una comida d'hermandá". La elección de la villa avilesina sigún los responsables de la formación nacionalista ye por mor que "per una parte nesta villa constituyóse la primer agrupación local de la coalición y esta ye una forma de sofitar el trabayu de los y les militantes na comarca, y per otra Avilés sufre la crisis social, cultural y ecolóxica del país".

Fonte: Asturies.com

Un saludu.

Etiquetas: Anuncies, Unidá

Rétulu billingüe del Tribunal Cimeru de Xusticia

Milenta vegaes el PSOE n'Asturies amosó que nun ta al favor del asturianu, ye más, quier el so desaniciu y facer un país que fale dafechu castellán. Siempre se quexen de lo caro que sedría caltener el billingüismu y promocionar l'usu y espardimientu de la llingua, magar qu'aprobaron una llei nesi sen, o defenden que si l'asturianu ye oficial va imponese a tola sociedá, tán engañando a la xente y pesie a eso dieranse dellos pasinos en cuantes a retulaciones nes conseyeries del "Principado", pero agora, les conseyeries de bientar y xusticia quiten esos rétulos basandose en que (afarraivos) l'asturianu nun ye llingua oficial d'Asturies...

Ye dicir, cartelos que yá taben pagos, que namái que facien que respetar los idiomes falaos nesta tierra son desaniciaos por mor de qu'a los conseyeros de turnu da-ys vergoña o igual-yos manca a los güeyos ver "Gobiernu del Principáu d'Asturies" en cuenta del tan cultu, refináu y español "Gobierno del Principado de Asturias".

En fin otru pasín p'atrás depues de 30 años de vindicación llingüística...y escosase'l tiempu.

Noticia estrayida de La voz de asturias

Un saludu.

Etiquetas: Artículos blancos, Llingua

Imaxe de la sé na presentación de la xunta executiva del conceyu

Como vien faciendo "fueyaenblancu" con casos de represión o de falta de llibertaes colos qu'amosó solidariedá, dende esti blogue tornase a denunciar un ataque a la llibertá nesti país, esta vez trátase de repetíes estroces na sé d'IAS (partíu que forma parte d'UNIDÁ) na ciudá de Xixón.

Foron trés yá les veces qu'esta sé sofrió ataques, esta última foi la frañidura con piedres de la so la luna, Pablo Rodríguez (cabezaleru del partíu en Xixón) declaró que “de va unos meses p'acá'l nuesu local de Xixón ta sufriendo una riestra d'ataques que van xubiendo en gravedá”. Nesti sen Rodríguez Alonso fexo una un recordatoriu de lo asocedío hasta'l momentu, “primero enllenáronnos la fachada del local con pegatines de l'asociación“N'AST”, tres d'esto frayáronnos un cristal de la puerta, poco depués de les elecciones del 27 de mayu ficiéronnos una pintada na que se lleía “Traidores” y finalmente esta fin de selmana'l llanzamientu de varies piedres frayó dafechu la luna del local”. El portavoz dio anuncia de qu'estos fechos “tán denunciaos a la policía pa intentar identificar a los responsables d'estos ataques, y ye que n'IAS camentamos que nun son ataques casuales yá que la so premeditación y que paezan tar rellacionaos cola participación d'Izquierda Asturiana na coalición UNIDÁ, faenos pensar que tamos sufriendo les 'represalies' de persones que nun tienen y nin conocen otra manera d'actuar que la violencia más estúpida”.

Pa finar Pablo Rodríguez quixo dexar claro que “por supuesto nun vamos dexar qu'un cogollín de descerebraos torguen el trabayu futuru que tien que desendolcar IAS y UNIDÁ.

Esperemos qu'esto nun vuelva asoceder y que los collacios d'IAS puean siguir desendolcando'l so trabayu.

Un saludu.

Etiquetas: Unidá

Etiquetas: Unidá

Un meme ye, sigún les modernes teoríes sobre la tresmisión de la cultura a les nueves xeneraciones, la unidá mínima de tresmisión de la herencia cultural y estos memes tán espardiendose per tola "blogosfera" asturiana y agora tocome a min facelo, non ensin agradecer al blog "Esfarrapando'l mundu" que me lo unviara.

Una tipografía: Comic Sans MS (nun sé, siempre me prestó)

Una páxina web imprescindible: Uiquipedia, coincido con esfarrapando'l mundu, yo yá collaboro n'ella y habriemos de mimala toos un pocoñín más. ¡A ver si esti ye l'añu de los 10.000!.

Un blog n'otra llingua estremada al asturianu:
"No Cap en Cap" (en catalán)

Y tres blogs a los que-ylo pasar:

-"González Y González", que me paez ún de los meyores blogs n'asturianu y que nun sé como naide nun lo escoyó entá.

-"Imperfeutu". El blog d'un home imperfeutu como somos toos.

-"FSA-de las JONS". Non por ideoloxía política, sinón por deprender a usar l'asturianu.

Un saludu

Etiquetas: Blogosfera

La Wikipedia n'asturianu "Uiquipedia" vien d'algamar la bona cifra de 8.011 artículos en llingua asturiana. El proyeutu entamáu por Jimmy Wales el 15 de xineru de 2001 y na versión asturiana en xunetu de 2004 tien 50 millones de visites al día y ta disponible en más de 250 llingües de tol mundu. L'asturianu ta nel puestu 69 del llistáu y les llingües del estáu que más artículos tienen son el castellán con 214.299 nel puestu 10 y el catalán con 55.677 nel puestu 21.

Adulces la Uiquipedia n'asturianu ta faciensose un güecu ente les llingües del mundu nesti bon proyeutu y animovos a toos a participar pa qu'esti seya l'añu de los 10.000 artículos.

http://ast.wikipedia.org/wiki/Portada

Un saludu.

Etiquetas: Anuncies

EL GOCHU FARTÓN

LA CONSEYERA D'INCULTURA

Pola llibertá d'espresión seya na llingua que seya. ¡NON AL PIESLLE DE TELEASTURIES!

Etiquetas: Llibertá d'espresión