La ponte "Golden Gate" ye ún de lo llugares favoritos non sólu de los turistes, sinón tamién de los suicides, tal y como preba un polémicu documental que se filmó demientres un añu los avatares na ponte na bahía de San Francisco.

Miles de turistes circulen cada añu pela emblemática ponte pa esfrutar del océanu, les vistes del perfil sinuosu de la ciudá de les colines o les de la islla d'Alcatraz.

Pero los turistes nun tán nel puntu mira d'Eric Steel, un cineasta qu'afincó les sos cámares mentanto un añu pa capturar 19 saltos y otros tantos intentos dende la ponte.

Munchos consideren al "Golden Gate" el llugar onde se cometen más suicidios nel mundiu.

Dende que se construyó, en 1937, tán documentaos 1.300 saltos, ente ellos los de Roy Raymond, el fundador del imperiu de ropa interior Victoria's Secret, en 1993, y Duane Garrett, demócrata y collaciu del vicepresidente Al Gore, en 1995.

La cifra total, sicasí, ye probablemente muncho más alta, yá qu'a ello habría que sumar les lexones de suicides furtivos que salten pela noche.

Parte del magnetismu ye por mor de qu'esta, a estremancia d'otres pontes, tien una barandiella esterior que facilita les coses, fasta'l puntu de qu'un psiquiatra llocal dixo al respeutive que ye "como tener una pistola cargada na mesa de la to cocina".

Etiquetas: Curiosidaes

Esta parodia de Hitler (Hynkel's) fecha por Chaplin na película "El Gran dictador" tien yá 67 años pero sigue faciendo gracia, da igual que seya xente mozo o vieyo'l que la vea, la parodia ye graciosa y ye un idioma mundial que nun entiende de llendes nin de tiempu. Poro, propongo que puxemos pol humor como llingua oficial, ye dicir que:

L'humor ha de gociar de protección. Ha promovese'l so usu, el so espardimientu nos medios de comunicación y la so enseñanza, respetando en tou casu les variantes locales.

Esti otru video tamién ye foriatu pero ta dobláu al castellán y tamién ye gracioso pese a que los Monty Python yá son de los años 70 y esta película ("Se armó la gorda") seya de 1971.

Nós n'Asturies hemos de puxar pa que se ponga en prautica la llei d'usu del humor y finar con coses como estes na nuesa televisión.
QUE NUN TIENEN NIN PUTA GRACIA

Por un humor asturianu y que mos faiga rir de verdá a toos. ¡L'humor llingua oficial!

Comment posted by Jesus
at 2/23/2007 2:45:00 AM
Jeje, yes un poquiñin tramposín Vity, facer una esbilla de lo meyor del humor de tolos tiempos pa metenos al final al 'memo burgués del añu' nun ye xugar llimpio. Yo ye que al tipo esi de la TPA nun sé onde-y vieron la gracia. Bueno sí, n'esa canal de 'graciosetes', que no de humoristes, de la Paramount Comedy, que yo nun-y veo la comedia por nengún llau y tan metiéndonoslo a embute.

Etiquetas: Artículos blancos, Humor

Viendo esti video tendríen que poneseme los pelos como escarpies dau'l derroche d'asturianía d'estes 20.000 persones, onde rescamplen los colores azul y mariellu, y el nome d'"Asturias" ta en boca de toos, onde s'alaben les fazañes de los astures, los mineros y de Fernando Alonso...pero nun ye asina, danme en cierta maner fasta vergoña.

Respeto que se puedan sentir mui asturianos y tol rollu, pero de xuru que d'esos miles de persones nin mil se pasaron per una mani pol asturianu, de xuru que voten partíos españoles y tán arguyosos de "construir Asturias", nun hai nada más cierto qu'eso, tán construyendo "Asturias" esa comunidá autónoma española que reñega del so pasáu y qu'estrapaya, ridiculiza o escaez la so propia cultura, o permite con impasibilidá qu'otros lo faigan por ellos, esa comunidá qu'amuesa la so máxima identidá col dichu d'''Asturias es España y lo demás tierra conquistada", esa Asturias avergoñada.

Pero si eses persones, se dedicaren a construyir Asturies otru gallu canciaría, maxinaivos una manifestación pola oficialidá el doble de grande, partíos asturianos col doble de votos, y el doble de persones que nun s'avergoñen de la so identidá. Con eso si construyes daqué, sinón mentantu siguiremos enfotaos nos trunfos de Fernando Alonso, los cancios tan asturianos de Melendi o nos políticos mazcaraos d'asturianos.

La cosa ye simple; o puchamos por Asturias o puxamos por Asturies, vosotros decidís.

Comment posted by Jesus
at 2/3/2007 9:15:00 AM
Nun sé por qué t'esmoleces. Esti videu ye una amuesa de la realidá asturiana, d'una mocedá que nun vive conflictu dengún pola integración de so patria n'España, pero que ta argullosa de la historia, de la cultura y de les peculiaridaes del so país. ¿Imaxines una actuación d'esta mena de la Oreja de Van Gogh, qu'acabara con un Gora Euskadi y besando ikurriñes?
El sentir 'nacional' asturianu ta ehí, pesa el 'Asturias es España...' y el covadonguismu, pero ta ehí. Namás falta que haya quien seya quién a empobinalu a mou pa qu'el país medre y seya meyor. Un saludín. (Soi Jesusito)

Etiquetas: Artículos blancos

Nun ye que yo me considere nengún académicu, lletráu o filologu pero hai una cosa que me ta cabreando dende qu'entame a dar esti añu por primer vez clas de llingua asturiana... Non solo la mayestra nun fala n'asturianu, nin sabe lleer correutamente sinón que nun sabe enseñar, tanto ye asina que la xente ta emprimando a pillá-y noxu yá non solo a l'asignatura y a la paisana sinón a l'asturianu. La cosa ye simple, los más de los qu'escoyeron l'asignatura ficiéronlo "porque ye fácil", non por vindicación llingüística, nin siquiera por interés, sinón porque ye fácil d'aprobar y murniamente esto suel ser asina en munchos centros onde les clases d'asturianu nun pasen de ser una hora llibre, mesmamente nel mio centru l'asignatura tien esa fama pola profesora del añu pasáu que dexaba falar siempre y cuando se falara n'asturianu, claro ta qu'ella nun s'esmolecía en si lo facíen o non...y asina mos va. Dende tolos movimientos asturianistes vemos perimportante la escolarización n'asturianu y añu tres añu va medrando'l númberu d'escolinos qu'opten por cursar llingua y esto debería alegranos, pero yo soi testigu de qu'entá nos queda muncho camín per delantre na normalización de la enseñanza del asturianu...entamando polos profesores.

Etiquetas: Artículos blancos