Fai tiempu que se fala de proyeutos de xuntanza pela nuesa blogosfera. Cosa dificil nel universu esti del asturianismu. Pero la xente que fai blogues, somos persones rares y estremaes. Asina que dempués d'un primer averamientu nel mes d'abril d'esti añu, baxo l'abellugu de la escuela de seronda, parez que llega la hora de formalizar esos contautos y xunir fuercies p'algamar un oxetivu común. A raiz de dellos comentarios ente diferentes blogues y dalguna qu'otra conversación privada, ñacen tres idees básiques:

1.Facer una primer quedada enbaxo'l nome "I Sidra&Blogues Pola Oficialidá", aprovechando la mani del C.A.O. del 24 payares d'Uviéu cola fín de conocese y falar de la creación d'una Xunta de Blogueros en Llingua Asturiana, y de la organización del "II Alcuentru de Blogueros en Llingua Asturiana" sobre'l mes d'abril de 2008.

2.Crear una Xunta de Blogueros en Llingua Asturiana, tomando les decisiones de los caminos a siguir.

3.Organizar de forma autónoma el "II Alcuentru de Blogueros en Llingua Asturiana", con tolo qu'ello conlleva (llugar, ponentes, material, suvenciones...) nestos siete meses que queden.

Fonte: TrayasgayA

Etiquetas: Blogosfera, Llingua

Heroes ye la primer serie cola entama esti blogue en "fas de prebes".

Col envís d'enanchar la variedá de conteníos n'asturianu na rede dende "fueyaenblancu" propongovos un nuevu proyeutu, onde toos podeis participar.

Nómase "Series n'ast" y tien como finxu cimeru l'ofrecimientu de series sotitulaes al asturianu pal esfrute de toos. La razón d'entamar cola segunda temporada d'Heroes ye, qu'amás de prestame la serie, esta entá nun llegó en castellán a les nueses pantalles y paezme un lluxu poder esfrutar d'una serie n'asturianu ensin tener qu'esperar a que la doblen, obviamente, en castellán. Pero nun futuru tamién podriemos entamar con series yá doblaes o inclusu atrevenos con dalguna película, too depende del nivel de participación qu'alquiera'l blogue, yá que como podrein entender too esto nun lo pue llevar una sola persona.

Un saludu.

Etiquetas: Anuncies, Llingua

Cartelu oficial tornáu al asturianu por "fueyaenblancu" ente la falta de sensibilidá del coleutivu convocante pa cola llingua asturiana.

Otra vuelta hemos de sofrir los asturianos, y nesti casu los uvieínos, la sovención d'un festexu criminal por parte de "los nuesos" políticos que nun dulden en marafundiar les perres públiques n'actos pa 4 amiguinos y pa caltener nun se sabe qué cultura. Y como ye lóxicu otra vuelta saldremos a protestar los que queremos que se desanicie esta práutica xabaz del nuesu país y que se baltie esa plaza de tortures pa enanchar el parque y que se puea esfrutar d'un paséu en cuenta d'un asesinatu cruel propiu de xente sanguinario y ensin nengún tipu d'escrupulu. Vémonos ellí. ¡LA TORTURA NUN YE ARTE NIN CULTURA!

Un saludu.

Etiquetas: Antitauromaquia

Cartelu de la convocatoria

Esti xueves 6 de setiembre fíxose un aconceyamientu del Conceyu Abiertu pola Oficialidá nun hotel d'Uviéu por mor de que'l CAO nun pudo disponer de nenguna de les sales públiques que se solicitaron pa esti actu.

Sicasí, a l'asamblea asistieron más d'ún cientu de representantes de les organizaciones que perfaen el CAO. Ellí, fíxose balance del trabayu fechu esti últimu añu y remarcóse la importancia del que queda per delantre, nun momentu que va ser decisivu pal futuru de la llingua asturiana yá que'l procesu de remocique del Estatutu ta entrando na so fase final. Poro, alcordáronse delles midíes pa encontar toles estayes de trabayu de la plataforma y entamar campañes y movilizaciones más ambicioses cada vuelta.

Sobre les campañes más inmediates, púnxose data a les prósimes movilizaciones. La Caravana pola Oficialidá dirá'l 27 d'ochobre pelos conceyos de Cangas y Tinéu, y el 3 de payares per L.lena y Ayer, les actividaes qu'acompañen a les caravanes van dir zarrándose nos prósimos díes.

Asinamesmo, presentóse'l cartelu de la manifestación que va facese'l sábadu 24 de payares n'Uviéu col lema "Na reforma del Estatutu, l'Asturianu Llingua Oficial". El Conceyu Abiertu pola Oficialidá quier dar un saltu cualitativu nesta movilización y multiplicar la convocatoria de les anteriores. Pa ello, ente otres aniciatives novedoses, la manifestación dirá precedida de 6 marches a pie dende Xixón, Avilés, Trubia, Mieres, La Felguera y La Pola Siero.

Fonte: Exunta.org

Un saludu.

Etiquetas: Llingua

Llogo de la páxina ueb.

Euskaltube.com, un sitiu ueb creyáu a imaxe y semayanza del famosu ueb d'intercambeu de videos You Tube, ñaz col envís de convertirse nel referente cimeru "de la videocreación social vasca en Internet", sigún el comunicáu oficial del so llanzamientu.

Esta nueva ueb, de la que'l menú ta esclusivamente escritu n'esuquera, permite a los internautes unviar los sos propios vídeos y visualizalos. "Eskaltube.com surge de la necesidad de dotar a la sociedad vasca de herramientas web 2.0 propias y, en especial, a aquellos que se expresan en euskara", desplica Haritz Rodríguez, el periodista que s'encarga d'empobinar esta xera.

Rodríguez afitó que, anque esta ueb ta dirixida a toles persones que quieran emplegala, "sin distinción de lenguas, el sistema esta desarrollado íntegramente en euskera, con el claro objetivo de fomentar el uso de la lengua vasca en la red de redes".

Tamién rescampló que l'oxetivu d'Euskaltube "no es hacer la competencia a ''Youtube'', algo impensable teniendo en cuenta el potencial y el número de usuarios con los que cuenta esta herramienta.

"Sin embargo, desde Euskaltube creemos que en paralelo a las herramientas globales de la red, las herramientas locales pueden tener su hueco" señaló.

Los vídeos que s'encolinguen n'Euskaltube nun habrán tar necesariamente editaos n'eusquera, pero cualaquier vídeo venceyáu al País Vascu, tean fechos en castellán o francés, tendrán mayores posibilidaes d'espardimientu que n'otres plataformes.

Un saludu.

Etiquetas: Internet, Mecigayu

Baxo'l lema "Asturies SÍ ye nación" la federación de partíos UNIDÁ va celebrar l'ochu de setiembre n'Avilés. Nun comunicáu la federación nacionalista señala que "pretendemos afirmar el 8 de setiembre como una xornada de reivindicación nacional asturiana y recordaremos la necesidá d'un modelu de financiación axustao a les nueses necesidaes, de la oficialidá de la llingua asturiana y d'un modelu de desarollu sostenible pal país".

Los actos d'UNIDÁ van consistir, sigún la nota de prensa ellaborada pola Xunta Coordinadora de la federación, nun "mitin políticu a les 13 hores na cai del Sol nel qu'intervendrán representantes d'UNIDÁ, tanto a nivel nacional como local, y nel que va contase cola participación de colectivos sindicales y sociales con presencia n'Asturies y nel que se recordará especialmente la efeméride del 70 aniversariu de la proclamación de la soberanía por parte del Conseyu Soberanu", asina como "una comida d'hermandá". La elección de la villa avilesina sigún los responsables de la formación nacionalista ye por mor que "per una parte nesta villa constituyóse la primer agrupación local de la coalición y esta ye una forma de sofitar el trabayu de los y les militantes na comarca, y per otra Avilés sufre la crisis social, cultural y ecolóxica del país".

Fonte: Asturies.com

Un saludu.

Etiquetas: Anuncies, Unidá

Pos nun hai muncho más que dicir que lo que sal nel video, quedada a nivel estatal el día 6 d'ochobre a les 19:00 delantre del ayuntamientu de la to ciudá pa glayar "Nun vas tener casa na puta vida". Pa más información entra equí y según vaiga saliendo información de lo que tea organizáu p'Asturies lo diré poniendo.

Un saludu.

Etiquetas: Mecigayu

Semeya de la formación "Soncai System" al completu.

El nuevu proyeutu nel que collabora Xune Elipe yá ta a la vienta, baxo'l nome de "ClashAsturies" el trabayu pretende abrir nuevos espacios na música fecha n'Asturies y n'asturianu con xente de toa triba como puen ser Delfo Valdés y Vito Álvarez de La Tarrancha, Mario Fueyo ‘Dark la eMe’, Aique de Chalaneru Sound System, Javier Tejedor, Rubén Bada de DRD, Eladio Díaz y Jorge Cambareli tamién de Dixebra, amás de los disc jokeys Dani Stylo y Dj pimp.

Amás otra bona anuncia musical que foi asoleyada por "La Voz de Asturias" pero que yo lleí por primer vegada nel blogue del Trasgu d'Areces, ye que va espublizase un discu n'homenax a los venti años de Dixebra como grupu cimeru del rock n'asturianu y de la vindicación llingüística y nacional col títulu de "Salú ya dixebra, 20 años en 20 canciones".

Un saludu.

Etiquetas: Música

Imaxe de la sé na presentación de la xunta executiva del conceyu

Como vien faciendo "fueyaenblancu" con casos de represión o de falta de llibertaes colos qu'amosó solidariedá, dende esti blogue tornase a denunciar un ataque a la llibertá nesti país, esta vez trátase de repetíes estroces na sé d'IAS (partíu que forma parte d'UNIDÁ) na ciudá de Xixón.

Foron trés yá les veces qu'esta sé sofrió ataques, esta última foi la frañidura con piedres de la so la luna, Pablo Rodríguez (cabezaleru del partíu en Xixón) declaró que “de va unos meses p'acá'l nuesu local de Xixón ta sufriendo una riestra d'ataques que van xubiendo en gravedá”. Nesti sen Rodríguez Alonso fexo una un recordatoriu de lo asocedío hasta'l momentu, “primero enllenáronnos la fachada del local con pegatines de l'asociación“N'AST”, tres d'esto frayáronnos un cristal de la puerta, poco depués de les elecciones del 27 de mayu ficiéronnos una pintada na que se lleía “Traidores” y finalmente esta fin de selmana'l llanzamientu de varies piedres frayó dafechu la luna del local”. El portavoz dio anuncia de qu'estos fechos “tán denunciaos a la policía pa intentar identificar a los responsables d'estos ataques, y ye que n'IAS camentamos que nun son ataques casuales yá que la so premeditación y que paezan tar rellacionaos cola participación d'Izquierda Asturiana na coalición UNIDÁ, faenos pensar que tamos sufriendo les 'represalies' de persones que nun tienen y nin conocen otra manera d'actuar que la violencia más estúpida”.

Pa finar Pablo Rodríguez quixo dexar claro que “por supuesto nun vamos dexar qu'un cogollín de descerebraos torguen el trabayu futuru que tien que desendolcar IAS y UNIDÁ.

Esperemos qu'esto nun vuelva asoceder y que los collacios d'IAS puean siguir desendolcando'l so trabayu.

Un saludu.

Etiquetas: Unidá

Otru añu más, y van dolce, dende los Països Catalans les JERC (Joventuts d'Esquerra Republicana) entamen l'Acampada Jove, un alcuentru xuvenil de calter independentista nel que se mecen charres y meses redondes con actos culturales y folixeros; esti cellebrase siempre na llocalidá de Sant Celoni y cunta con mui bona acoyida superando cada añu'l númberu d'asistentes (l'añu pasáu algamose la cifra de 38.000 asistentes.

La llista d'actos progamaos pa l'Acampada Jove que se cellebrará demientres los díes 12, 13 y 14 de xunetu podeis atopala na páxina ueb oficial de la mesma.

Orixinal video promocional de l'Acampada:

Video promocional del festival de música:

Aprofito per saludar a tots els catalans que visiten aquest blog i animar-los a continuar lluitant per la seva cultura i pels països catalans.

¡Visca la terra! ¡Puxa Asturies!.

Un saludu.

Etiquetas: Internacionalismu