Llégame al corréu lo viniente:

La Xunta Direutiva del Aconceyamientu de Xuristes pol Asturianu, col comunicáu darréu, quier reprochar públicamente a los partíos PSOE y PP el so intentu de desaniciar dafechu la llingua asturiana pente medies de la reforma del artículu 4 del Estatutu d'Autonomía.

Nel mesmu sen, pidi a tolos asociaos y simpatizantes qu'acudan xunto cola familia y amigos al actu públicu que sol llema ¡RESPETU P'ASTURIES! tendrá llugar el XUEVES 17, A LES 19 HORES, NA SALA DE CÁMARA DEL AUDITORIU "PRÍNCIPE FELIPE" D'UVIÉU.

RETROCESU DEMOCRÁTICU

Énte'l proyeutu d'artículu 4 pal Estatutu d’Autonomía apautáu por PSOE y PP, l'Aconceyamientu de Xuristes pol Asturianu considera un deber cívicu alvertir a tola ciudadanía que:

1. El so conteníu y espíritu ta sacáu del Decretu 2929/1975 (art. 1: “Las lenguas regionales son patrimonio cultural de la Nación española… Su conocimiento y uso será amparado y protegido por la acción del Estado”) pel que'l réxime franquista, yá nes boquiaes, intentó desaniciar les xustes reivindicaciones de la España plurillíngüe.

2. Empobínase a la escontra d'ún de los principales oxetivos de la Constitución, recoyíu nel so Preámbulu: “La Nación española proclama la so voluntá de protexer a tolos españoles y pueblos d'España nel exerciciu de les sos llingües”.

3. Desprecia los mandaos de la Carta Europea de les Llingües Rexonales o Minoritaries, tratáu internacional ratificáu por España que forma parte del denomáu bloque de constitucionalidá, onde se proclama, artículu 7.2, que “Les Partes (ratificantes) comprométense a desaniciar, si entá nun lo ficieron, tou distingu, esclusión, restricción o preferencia inxustificaes con repeutu al emplegu d'una llingua rexonal o minoritaria col oxetivu de desalendar o poner en pelligru'l caltenimientu o'l desendolcu de la mesma.

4. Ye una vergoñosa l'agresión a la llingua asturiana y a los drechos fundamentales de los sos falantes y un intolerable actu de discriminación pa con tolos asturianos que somos trataos pol PSOE y el PP, partíos qu'en toles otres comunidaes autónomes billingües sofiten la cooficialidá, como ciudadanos con menos valir que'l restu de los españoles.

N'Uviéu, a catorce de xunetu de dos mil ocho.

Pol Aconceyamientu de Xuristes pol Asturianu robla'l so presidente

Xosé María Estrada Janáriz

---------------------------------

Un saludu.

4. Axuntanza [de persones pa tratar d'asuntos d'interés social].

De xuru que los más recordaréis los tiempos de los foros d'Asturies.com. Insultos gratuitos baxo una IP y descalificaciones continues tanto a persones como a organizaciones de toa mena, tou dende casa y al algame de cualquiera. Tres munchu tiempu y tres un llargu pidimientu de rexistru pa postiar nesi foru, ensin dar más esplicaciones decidiose zarralu, cosa que tampocu habría de ser asina. Surdiría llueu una iniciativa nomada "3 países una llingua" un foru fechu baxo una premisa que non tol mundu tien que compartir y que nun duró demasiao. L'alderique féxose sanu (al mio paecer) treslladandose los comentarios a los posts de tola bloguesfera y dexando a la xente cafiante, por fin, ensin un muérganu d'espresión.

Depués de munchu percorríu apaez agora Nastur.com un intentu de recuperanza y puesta en común de lo bono (si ye que quedaba dalgo) d'aquella ferramienta pal alderique de los asturfalantes. El proyeutu alcuentrase entá en desendolcu, pero pue vese, a les clares, l'enfotu que punxeron en facer les coses bien y adautaes un pocoñin a les posibilidaes téuniques d'anguaño, eso si, esto a dellos nun-yos va prestar, hai moderador y hai que se rexistrar...

Un saludu.

Alberto Jõao Jardim quier que "se clarifiquen les competencies del Estáu y les d'esta rexón autonoma". El martes falaba d'un referendu, pero'l miercoles matizó que quier convertir les vinientes eleiciones llexislatives nun plebiscitu. El presidente yá tenía dicho a entamos d'añu qu'apoyaría la independencia'l dia que "el pueblu la demande'.

Madeira podría dir a les urnes pa pronunciase sobre l'autonomía de les islles, según tien anunciao esta selmana'l so presidente, Alberto Jõao Jardim. El martes pasáu, nuna visita a Venezuela, anunció que'l Gobiernu convocaría un referendu pa que los ciudadanos de Madeira ratifiquen o refuguen la propuesta de reforma constitucional fecha pol Parllamentu del archipiélagu. Llueu, el miércoles, el presidente matizó estes declaraciones y dixo que quier convertir les eleiciones llexislatives de 2009 nun "plebiscitu" sobre la propuesta de revisión constitucional que fadrá'l parllamentu, según informa Notícias Lusa.

"Aprobaremos nel Parllamentu de Madeira una propuesta de revisión constitucional pa que se clarifiquen les competencies del estáu y de la rexón autónoma", foron les pallabres del presidente, citáu pol diariu Público. La oposición, nel mesmu Parllamentu, tien censuraes estes declaraciones, argumentando que l'autonomía de Madeira nun permite facer referendos sobre materia constitucional.

Tal y cómo recuerda'l dixital gallegu Vieiros, Jõao Jardim fexo unes declaraciones el xineru pasáu sobre l'autonomía de Madeira, diciendo qu'apoyaría "al pueblu'l día que se quixera independizar de Portugal". Magar que nun se considera independentista, aseguró que quier otru sistema autonómicu, "que Lisboa nun aceuta, por simple autoritarismu absurdu".

L'Archipiélagu de Madeira ye anguaño una de les rexones autónomes de Portugal, xuntu coles islles Azores. Tien los sos propios estatutos políticos y alministrativos, asina como Gobiernu y Parllamentu propios. Depués d'una reforma constitucional nel añu 2006, la figura tradicional de ministru de la República, que representaba al Estáu nel archipiélagu, tien sío sostituyida pol representante de la República, qu'esfruta de menos poderes.

Fonte:Nationalia.cat

Tornáu por fueyaenblancu.

Un saludu.

WATCH, l'equipu llegal que da soditu a les estremaes redes que protesten escontra'l G8 en Xapón, denuncia nueves denegaciones de visáu y refugos nel aeropuertu d'activistes que pretendien participar n'actividaes relatives a la cume del G8.

Dos miembros d'una ONG de Bangladesh tienen visto como la embaxada xaponesa en Dhaka torgaba-yos el visáu ensin alegar motivu dalu.

Nel aeropuertu internacional de Chitose (Hokkaido) el pasáu dia 3 prohibieron la entrada al país a 19 militantes d'una organización campesina coreana. La escusa emplegada ye que nun tenien pruebes documentales de tolo que diben facer nel país.

Amás un miembru d'una ONG filipina canceló'l so viaxe a Xapón por mor de la tardanza na emisión del visáu que solicitó. Estes tardances nun son nada casuales yá qu'hai varios casos más, torgando inlcusive l'acessu a persones citaes que tenien brindes d'organizaciones xaponeses, y qu'en dalgún casu diben impartir seminarios.

Estos casos vienen a sumase a otros, como la retención demeintres 10 hores nel aeropuertu de Narita d'un grupu de mediactivistes de Hong Kong, o la orde recibida pola activista estaunidense Lisa Fithian d'abandonar l'estáu enantes del dia 5 de xunetu.

Vía: http://anticapitalistas.net/

Un saludu.

Entamen los preparativos pa la contra cume del G8 qu'esti añu sedrá en Hokkaido, Xapón. El coleutivu Acción Global Anticapitalista ta en Xapón pa participar ya informar al rodiu de la evolución de la resistencia.

Aterrizaxe ya IRA

Ruíu en Narita

El grupu de los 8

Vía
*anticapitalistas.net

*LaPlataforma

Un saludu.

Torné p'Asturies y topeme col encierru, nun mos queda otra que siguir puxando.

La Xunta pola Defensa de la Llingua Asturiana convoca una concentración de sofitu a los estudiantes enzarraos pal martes a les 12.45 hores.

Un saludu.

PD: Colo de la seleición española nada que celebrar. ¡Oficialidá pa les seleiciones deportives asturianes!

Pa los veceros de la bloguesfera n'asturianu'l nome de "Sidra & Blogues" de xuru que nun vos ye ayenu, recordaréis que fuera'l nomatu que se punxera al primer aconceyamientu de blogueros en llingua asturiana celebráu nuna sidrería'l 24 payares del añu pasáu.

Pues bien, pa resumir y nun allargame demasiao (que toi de vacaciones) quiero dicivos que dende "El Comercio" llegóme un brinde a participar cola mio asistencia en "BlogAsturias", un alcuentru de blogueros asturianos, que, como ye vezu, incluso ente xente que recibe sovención por supuesta promoción del asturianu, escaez nel so programa la llingua asturiana, siendo tolos intervinientes dueños de blogues en castellán.

Poro, y porque voi tar fuera del país los 2 díes que dura l'eventu, amás de la gracia que me fai'l descaru de copiar lliteralmente lo de Blogs & Sidra, diciendo que ye la primer vegada que se fai, nun voi asistir (como yá fici saber al xerente que se punxo en contautu conmigo) y afálovos a que faigais lo mesmo.

Un saludu.

[...] El PSOE retoma sus críticas y pide la hoguera en la Catedral. Los socialistas proponen como material combustible el acta de diputado de Gabino de Lorenzo, el acuerdo de la consignación de los fondos de «Villa Magdalena» o las 1.600 boinas «que tan mala suerte han traído al Real Oviedo». Además, piden que Cachero salte la hoguera para purificarse.

Si esto lo llega facer cualquier otru partíu d'ámbetu nacionalista, yá taríen los periódicos enllenos de cartes al direutor de Círculos d'inteleutales pidiendo la so illegalización o coses pol estilu...

Un saludu.

Namás qu'ocho persones nel mundu falen el "xwja" o "ixcateco" y toes elles viven nuna pequeña llocalidá del Estáu mexicanu d'Oaxaca, al sur del estáu, informó'l martes el Conseyu Nacional pa la Cultura y les Artes (CNCA) de México.

"Les llingües muerren por desusu, silenciu ya indiferencia" (¿de qué nos sona esto a los asturianos?), señaló'l CNCA, qu'informó de que la mayoría de los falantes del "ixcateco" tán collaborando con un grupu d'investigadores pa torgar la estinción de la so llingua.

"La xera ye perdificil y complexa, porque los últimos falantes del "xwja" son persones con edaes superiores a los 70 años, malpenes falen castellán y nun saben lleelu nin escribilu. Y pa reimplantar la llingua materna, primero hai de sensibilizar a la xente", rescampló Guillermo Círigo Villagómez, coordinador de la "Unidad Regional de Culturas Populares" n'Huaxuapan de Lleón, Oaxaca.

Los ocho falantes del "ixcateco", llingua perteneciente al grupu popolocanu, de la familia llingüística otomangue, viven en Santa María Ixcatlán y siete son d'edá avanzada. Ixcateco significa en llingua náhuatl "persones d'algodón".

Acordies col llingüista estaunidense Michael Swanton, que tamién participa nes actividaes pa torgar qu'esapaeza l'ixcatecu, a fines de 2006 había 11 persones que lo falaben, pero nel últimu año y mediu morrieron tres.

Nos próximos meses ta previstu que se dean una riestra de talleres impartíos pola "Unidad Regional de Culturas Populares", institución dependiente de la Secretaría de Cultura d'Oaxaca, y el CNCA, como yá se fexo l'añu pasáu. Amás, fadráse un rexistru videográficu de los falantes.

Acordies con datos de la Comisión Nacional pal Desendolque de los Pueblos Indíxenes, el "xwja" ye una de les 23 llingües indíxenes mexicanes en riesgu d'estinción, xuntu col paipai, quiligua, cucapá, aguacatecu y cumai de Baxa California (norte de México); el quicapú de Coahuila (norte); y el xacaltecu de Chiapes (sur), ente otros.

Un saludu.

85.000 euros. Ésta ye la cantidá que-yos podríen imponer de multa a dos trabayadores de les piscines municipales d'Avilés y al sindicato CSI. La Plataforma contra la Represión y por las Libertades anuncia que ye un intentu de criminalizar les protestes llaborales.

El motivu de la querella ye'l reparto d'una fueya na que se denunciaben los planes de privatización de les piscines municipales d'Avilés.

La plataforma organizará una manifestación el próximu 10 de xunu n'Avilés pa intentar algamar que se retire la denuncia.

Un saludu.