Yá se tán cociendo les actividaes de la Cume Alternativa al G-8 que quier dar amuesa de que'l conxuntu del movimientu altermundialista o antiglobalización caltien encesa la so actividá y la so engarardiella al respeutive del erru que suponen les polítiques neolliberales que mos llanten día tres día. Estos Xefes de Gobiernu de los países más poderosos del mundu aconceyen cada año pa falar y tomar dicisiones sobre toos nós, sobre problemes que mos afeuten como habitantes del planeta. Temes arreyaos a la inestabilidá de los mercaos financieros, el problema de les migraciones, la democratización de les instituciones europees, el cambéu climáticu, los problemes de la delda y de la probitú nel tercer mundu y en particular nel continente africanu o'l problema de la enerxía.
No que cinca a les movilizaciones, yá tán programaes delles demientres esti mes de mayu, en defensa de los intereses de los ciudadanos y inmigrantes venceyaos a la Cume del G-8. Van siguir de magar xunu, cuando se prevén desplazamientos conxuntos n'autobús o en tren pa confluyir n'Alemaña: dende Noruega, Suecia y otros países escandinavos; dende los estaos de Francia, Suiza, Holanda, Bélgica, España y Portugal y dende Austria, Italia o Hungría.
Dende esti humilde blogue voi intentar facevos llegar tola información qu'atope de lo asocedíu n'asturianu y cola mayor rapidez posible.
Un cientu d'autivistes ocuparon el pasáu 11 d'abril una facultá abandonada en "Ciudad Universitaria (Madrid)", poniendo en práutica la recuperación d'espacios pa los estudiantes.
“Soberanía ye nun tener un soldáu estranxeru más en suelu llariego. Si tenelos nun ye gran torga, d'alcuerdu, en 2009 podemos renovar el conveniu de la basa de Manta si EEXX mos permite poner una basa ecuatoriana en Miami”. D'esta mena anunció Rafael Correa, presidente d'Ecuador, la so intención de nun renovar l'alcuerdu que permite a EEXX tener una basa militar en suelu ecuatorianu, intención que ratificó demientres la I Conferencia Internacional pol Desaniciu de les Bases Militares Estranxeres, cellebrada en marzu nesti país.
Oficialmente, EEXX tien 737 bases en 130 países -un 95% de toles bases a nivel mundial- qu'agospien al rodiu de 200.000 militares, otros 200.000 civiles y 81.425 contrataos llocales. En total, 3.000 millones de metros cuadraos ocupaos por bases estaunidenses fora del so territoriu. Pero na práutica, el númberu de bases d'EEXX nel estranxeru pue algamar les mil, sigún l'analista Chalmers Johnson, yá que l'últimu "Base Structure Report", cincante a 2005, nun cuntabiliza les afitaes en Kosovo, Afganistán, Iraq, Kirguizistán, Israel, Qatar, Turquía, Gran Bretaña... Mil bases que conformen lo que Johnson califica como'l “imperiu americanu de bases”, y del que'l so espardimientu ta lloñe de tar aparáu.
De fechu, la estratexa de reestructuración de la rede de bases militares estaunidenses nel mundu p'adautala a “les nueves menacies” tres la fin de la Guerra Fría y el 11-S, y concretada en 2004 nel Global Posture Review, tien como envís la creyación d'una telaraña de pequeñes bases, les nomaes lily pads, que permitiríen el despliegue d'una fuercia militar más flesible dende los EEXX a cualaquier puntu del mundu nun tiempu récor y que-yos permitiría actuar en varios frentes a la vez. Les lily pads- ‘nenúfares’, porque permitiríen a les fuercies d'EEXX blincar d'un “focu caldíu” a otru d'igual mou qu'una xaronca emplega los nenúfares nun estanque- agospien a ente mil y 3.000 soldaos, pero con capacidá para xorrecer esti númberu en momentos puntuales. La intención, anunciada por Bush, de facer tornar a EEXX a 70.000 militares y 100.000 civiles de varies bases afincaes n'Alemaña y Corea del Sur tres la II Guerra Mundial, se verá acompangada pola medra d'estes bases a lo llargo de lo que los espertos del Pentágonu denomen l'“arcu d'inestabilidá”, ye dicir, un área que va dende América Llatina fasta Asia, pasando per África, los Balcanes, Oriente Mediu y el Cáucasu, unes zones riques en recursos ñaturales y poles que pasen les rutes estratéxiques del petróleu y los hidrocarburos. Mientres, al yá eleváu númberu de bases n'Europa, s'amestarán lily pads en Rumanía y Bulgaria, y la instalación na República Checa y en Polonia d'un radar como parte del proyeutu d'escudu antimisiles. Esta rede de bases s'utilizaría en “la llarga guerra” plantegada pol Pentágonu “escontra'l terrorismu y otres menacies”, y de la que'l so oxetivu, según el Quadrennial Defense Review de 2006, ye poder “aperiar en tol mundu” y “derrotar rápidamente” a dos alversarios en campañes militares simultánees. Sigún el periodista Nicolas J. S. Davis, “mentanto declina'l suministru de petróleu, les lily pads tienen un oxetivu militar específicu: organizar operaciones ufiensives conforme xurdan oportunidaes pa imponer nuevos rexímenes políticos y comerciales en nome de la estabilidá y les necesidaes d'un mundo sedientu de petróleu”.
Pa lleer l'artículu completu orixinal (en castellán) calca nel enllaz Periódicu Diagonal
Siguiendo cola mio campaña de sofitu a "La Plataforma" apurrovos equí información sobre lo asocedíu, un videu y una entrevistuca al coleutivu.
Un grupu d'activistes del coleutivu 8 de marzu okuparon l'antiguu Salón de bodes Milano de Madrid, una selmana depués, a una hora del entamu d'una merienda vecinal organizada pa los vecinos y como parte de les "Xornaes de Presentación", la policía precintó l'edificiu y anició una campaña de presión cola intención d'acabar col proyeutu enantes de que pudiera char raígañu.
Okupación del Salón Milano:
Entrevista:
¿Qué entendemos por okupación?
Vivimos nun sistema que tien privatizao'l suelu que triamos convirtiéndolu nuna mercancía más, y tien afitáu un modelu desendolquista xabaz que se manifiesta na masiva proliferación d'urbanizaciones, campos de golf, autopistes, puertos esportivos... y una riestra d'infracadarmes, na so inmensa mayoría innecesaries, xenerando graves problemes ambientales y sociales. Los gobiernos de turnu implementen estes polítiques en beneficiu de los intereses empresariales, prevocando, ente otres coses, que les desigualdaes ente la clas políticu-empresarial y la clas trabayadora seyan cada vuelta mayores.
Nel desendolque y consolidación d'esta política, el sistema necesita al empar apagar toa espresión de resistencia popular. Demientres cientos d'edificios s'afayen nuna situanza d'abandonu esperando la so recalificación (y poro, la medra del so valir especulativu), los llocales públicos onde poder aconceyar, organizase y tomar parte nes cuestiones qu'afeuten a les nueses vides, tán mayormente remanaos pola burocracia del orde institucional nos sos estremaos entes, estatal, autonómicu y llocal.
Poro, okupamos. Porque creyemos necesariu denunciar y lluchar escontra la especulación urbanística con fechos amás de con pallabres. Porque necesitamos espacios onde acomuñar y puxar poles protestes esistentes, creyar puntos d'alcuentru pa la tresformación revolucionaria de la sociedá. Porque magar que nos medios privaos y públicos de desinformación dicen qu'esti sistema ye democráticu, creyemos que ye hora de conquistar la democracia real cola participación popular na política anticapitalista, activando la llucha nos barrios y construyendo asina la braera democracia direuta.
Porque creyemos qu'okupar ye recuperar lo que mos pertenez, lo que pertenez a la mayoría la población, la que trabaya por un miserable salariu construyendo los edificios onde vivimos y amasando'l pan que comemos, y que sicasí, llueu nun ye dueña de lo que produz (más bien cada día mos cobren más por tou). Malpenes somos dueños de los nuesos propios cuerpos, que mos ubliguen a poner a disposición d'empresarios y banqueros que s'enllenen los bolsiellos a la nuesa costa. Okupar ye, cenciellamente, recuperar lo que mos quitaron.
Okupamos porque queremos atacar el pegollu cimeru del sistema capitalista: la propiedá privada (que penriba de los cuentos de fades ye la escusa p'ariquecer más a quienes más tienen y afogar a quienes menos tienen).
¿Por qué lluches queremos puxar?
Na sociedá hai una bayura de confliutos abiertos, asina como coleutivos que lluchen por una sociedá meyor. Queremos sirvir de sofitu a campañes xunitaries anticapitalistes na midida de les nueses posibilidaes, poniendo l'exe nes vinientes estayes:
Anticapitalismu y oposición al estáu burgués: Caltriamos que'l capitalismu ye un sistema basáu na medra constante de riqueces ensin tener en cuenta les necesidaes humanes, ye dicir, pon les nueses vides y los recursos ñaturales al serviciu de les empreses y non de les persones. L'estáu nun ye otra cosa qu'un conxuntu de lleis y instituciones que pretenden garantizar la perpetuación d'esti modelu, yá sía con instrumentos ideolóxicos (remanamientu de la educación, la cultura, los medios de comunicación...) o represivos (lleis, espidos, policía, xueces, cárceles, ausencia de drechos, etc.). Abrimos les puertes a toos/es aquellos/es que, lloñe de cualaquier dogmatismu, día a día intenten facer frente a esti orde social, yá seyan marxistes, autónomos, llibertarios, antiglobalización, etc.
Movimientu de los y les trabayadores: Caltriamos que la riqueza se creya única y esclusivamente dende los centros de trabayu, col esfuerciu tanto de nativos como d'inmigrantes (entendiendo que dambos constitúin una única clas trabayadora), y poro hemos ser conscientes de que tomando baxo'l nuesu control democráticu estos centros de creyación de riqueza podemos poner en xaque'l sistema, cuestionando la venceya inxusta esistente ente los empresarios capitalistes y trabayadores. Naguamos por aportar un granín d'arena a aldericar y organizanos xunto al restu de trabayadores pa emprimar esti camín, qu'hestóricamente mos abultó y mos sigui abultando vital.
Antipatriarcáu: El sistema capitalista y el patriarcal van de la mano. El primeru diseña los puestos de trabayu, y el segundu los distribúi basándose na conceición de xéneru impuesta: normalmente les muyeres desendolquen sobre manera trabayos de curiaos y los homes de xestión (tanto dientro como fora casa). Esta lóxica se caltién al traviés de la presión mediática, la violencia física o sicolóxica (esta cabera la más peligrosa), que coloca a la muyer nuna situanza de desigualdá y esplotación, con menos drechos, menos autonomía y menos reconocencia social. Damos la bienllegada a coleutivos que proponen ferramientes de llucha feminista, l'autoorganización de les muyeres y l'autodefensa física y mental.
Antimonarquía: Vivimos nun réxime nel que'l xefe d'estáu, el rei Juan Carlos I, foi educáu nes fuercies armaes franquistes y nomáu direutamente por Franco en 1969 como'l so socesor. La monarquía ye una institución medieval y antidemocrática dafechu, que pretende simbolizar l'harmonía d'un sistema heriedu de la dictadura y remendáu na nomada Transición (que foi un pauto ente la oligarquía y les fuercies que se nomaben de la esquierda pa dar continuidá al capitalismu y torgar un procesu de llucha revolucionaria). Queremos, poro, sofitar a movimientos que denuncien esta imposición, yá sían antifacistes, republicanos anticapitalistes, de recuperación de la memoria hestórica, etc…
Antiimperialismu: Nun podemos quedanos impasibles cuando les grandes potencies, ente elles l'Estáu Hespañol, remanen -pela vía de la fuercia y la imposición- les economíes de los países emprobecíos y saquiaos. Creyemos que la OTAN (incluyíes les sos bases destacaes en territoriu estatal) ye un preséu militar que garantiza'l dominiu del Norte sol Sur pela vía de la violencia estrema. Queremos apoyar a los movimientos que denuncien el papel imperialista del estáu español y se solidaricen colos pueblos en llucha pola so independencia y el so autodetermín.
Ecoloxismu: El capitalismu nun ye caltenible a nivel ambiental. Cientos d'especies animales y vexetales tán en peligru de desaniciu pola sobreesplotación abusiva, innecesaria y irracional de los recursos ñaturales. El capital nun entiende de sostenibilidá sinón de productividá, de sacar el maxime rendimientu al mínimu coste. Ye'l nuesu deber puxar poles aniciatives que finen con esta dinámica depredadora y entamar a denunciar el terrorismu ecolóxicu de les empreses, entidaes y instituciones que contaminen los ríos, amburen les viesques, dexen el suelu ermu pa siempre y torturen animales, al empar qu'esparden un mou de vida insostenible col ecosistema.
¿Cuálos son los nuesos preseos?
Aición direuta: Nun podemos siguir esperando lo imposible, que les instituciones igüen un problema qu'elles mesmes xeneren y defenden, poro decidimos actuar direutamente ensin la so mediación y control. Organizamonos y amosamos que ye posible tomar les riendes de les nueses vides direuta y coleutivamente.
Asamblearismu: Somos asamblearios porque les decisiones polítiques tomamosles horizontalmente ente toos/es y nun hai muérganu de decisión coleutiva más efeutivu y democráticu que l'asamblea.
Sofitu mutuu: Queremos recuperar la cultura de la solidariedá y el compañerismu, como forma de facer frente al individualismu xabaz qu'opera nesta sociedá y porque creyemos qu'hemos d'apoyanos unos a otros nel llargu camín de construyir un movimientu anticapitalista ampliu y plural.
Coordinación política: Pa salir del aislamientu al que'l poder capitalista pretende someter a les lluches locales, creyemos que ye fundamental xunir fuercies al traviés de la creyación d'espacios de confluyencia con otros coleutivos o organizaciones en pos de sacar alantre campañes de llucha tanto defensives (de resistencia) como ufiensives (d'avance). Naguamos, en definitiva, por participar y puxar activamente polos espacios de coordinación anticapitalistes.
Espardimientu del nuesu trabayu y idees: Al traviés de charres, fancines, uebs, videofórums, cartelos, murales, teatru, videos, música, etc... pretendemos dar a conocer aquello que los medios oficiales intenten tapecer (inxusticies y resistencies), pa caltener l'orde asesín y esplotador.
Alderique, reflexón y autoformación: Caltenemonos alerta escontra'l dogmatismu. Revisar los nuesos conceutos, conocer y deprender d'otros/es collacios/es y d'otres lluches yá seyan d'anguaño o pasaes, asina como de los munchos teóricos y práuticos revolucionarios qu'esistieron, ye tamién una mena d'aición anticapitalista. Conocer la nuesa hestoria pa nun tar condergaos a repitir los mesmos erros, alquirir habilidaes téuniques pa meyorar la nuesa actividá cada día, caltenenos siempre en movimientu...
* El Coleutivu 8 de marzo (enantes Quilombo) se defín como un espaciu d'alcuentru ente activistes anticapitalistes (muyeres y homes) de varios coleutivos y organizaciones, que pretenden contribuyir a l'activación de la resistencia social nos barrios de Madrid.
Esti branu del 6 al 8 de Xunu el "G-8" tornará aconceyae n'Alemaña. Una nueva cume pa continuar col control del so mundu.
Pero los ciudadanos del mundu vamos camudar el rumbu de la hestoria.
El 7 de xunu de 2007 podemos facer qu'esti mundu absurdu, sosteníu por nós, caiga.
El 7 de xunu nun trabayes, nun consumas, toma la cai. Organiza la to rabia, llibera los tos suaños.
El 7 de xunu vemonos nes cais.
Esta protesta xeneral escontra los causantes de les inxusticies globales que carez el ser humanu y la natura, se fadrá'l 7 de xunu de 2007 día intermediu del próximu aconceyamientu del "G-8". Una protesta qu'encamienta a un paru d'un día tanto nel trabayu como nel consumu, pa qu'estos gobiernos integrantes del "G-8" vean como coles nueses aiciones tamién podemos influyir nes sos economíes neolliberales y esclavizadores. Amosaremos que, como diz José Saramago, “hay dos superpotencias en el mundo: una es EEUU y otra eres TU”.
Promueve col to esfuerciu l'espardimientu d'esta aición global per tolos medios de que dispongas, d'ello dependerá que puea tener una repercusión global y realmente tresformadora de la inxusta realidá que presenciamos y fasta favorecemos cola nuesa pasividá.
N'Asturies habríamos d'entamar daqué, non violentu, nun mos podemos quedar paraos.
Más de 1000 persones manifestaronse'l pasáu 24 de febreru n'Alcorcón en defensa del CSO Eskuela Taller y los espacios okupaos. La movilización vindicó l'autoorganización, l'autoxestión y l'autonomía como armes de llucha escontra la represión institucional y escontra'l capitalismu.
La eskuela taller yera un espaciu nel que lluchar escontra la privatización del suelo, privatización de la vivienda, privatización de la vida social, privatización de les persones y nel que xovenes y non tan xovenes decidieron inventar formes de resistencia y de recuperación de la nuesa gayola, el nuesu sentíu comunitariu y la nuesa autonomía frente a los estamentos nobiliarios. Asina, na antigua Escuela-Taller d'Alcorcón (Madrid), una pandiella de rebeldes tenía alzáu l'hachu de la okupación p'asestar un fermosu güelpe al pegoyu del sistema capitalista: la propiedá privada. Equí podéis ver un video d'esta eskuela taller.
"La Plataforma" ye un coleutivu de militantes anticapitalistes, que s'involucren na llucha pola subversión del orde impuestu vindicando l'arte como arma político, desendolquen un proyeutu de contrainformación audiovisual como voceru de los protagonistes de la desobediencia popular.
L'añu 2006 tuvo enllenu d'actividá y reunenla toa nesti dvd que tien los vinientes videos:
01 Manifestación estudiantil escontra'l plan Bolonia [2m 47s]
02 Manifestación pola 3ª República [3m 19s]
03 Manifestación Stop Represión [3m 13s]
04 Manifestación en Móstoles pola okupación [4m 05s]
05 Retirada de plaques facistes pola Coordinadora Antifacista de Madrid [3m 38s]
06 Selmana llucha social '06: Exes
07 Manifestación escontra l'agresión a Libanu y Palestina [3m 38s]
08 Manifestación en Valencia pola okupación [1m 57s]
09 Manifestación pola vivienda digna [3m 16s]
10 Concentra-Aición de sofitu a los deteníos antiLOU 2001: Rectoráu de la UCM [3m 37s]
11 Manifestación en solidariedá con Iñaki de Juana y los/les presos/es políticos/ques vascos/ques [3m 09s]
12 Manifestación Antifacista: Solidariedá con ACP Estrella Roja [2m 34s]
EXTRES
Manifestación 26 de Xunetu: Solidariedá con Cuba [3m 05s]
Trailer Movimientu de Trabayadores Desocupaos (Arxentina) [1m 45s]
Trailer Barrio de Regla (Cuba) [3m 49s]
Tolos videos podéis atopalos na so ueb [http://theplatform.nuevaradio.org] y amás vos recomiendo que veais el so documental "Memoria, dignidad y lucha" [http://video.google.es/videoplay?docid=2287661181589046085].
Yá se tán cociendo les actividaes de la Cume Alternativa al G-8 que quier dar amuesa de que'l conxuntu del movimientu altermundialista o antiglobalización caltien encesa la so actividá y la so engarardiella al respeutive del erru que suponen les polítiques neolliberales que mos llanten día tres día. Estos Xefes de Gobiernu de los países más poderosos del mundu aconceyen cada año pa falar y tomar dicisiones sobre toos nós, sobre problemes que mos afeuten como habitantes del planeta. Temes arreyaos a la inestabilidá de los mercaos financieros, el problema de les migraciones, la democratización de les instituciones europees, el cambéu climáticu, los problemes de la delda y de la probitú nel tercer mundu y en particular nel continente africanu o'l problema de la enerxía. 
Esbilla
del.icio.us
VITY
