El 17 de setiembre próximu podemos vivir ensin capitalismu n'Asturies.

El xueves 17 de setiembre colocaráse un puntu informativu en Cuatro Caminos (Xixón - La Calzada) ente les 18 y les 21 hores.

Nél entablararáse un puntu de comunicación coles persones interesaes sobre formes, maneres y alternatives qu'esisten pa sacar al capitalismu de les nueses vides.

‘Podemos vivir sin capitalismo’ ye una campaña formada por miles de persones y coleutivos que puntualmente salen a la cai pa facer visible quienes son y llegar a más xente, mientres que día a día van realizando práutiques, cada vuelta más, pa cambiar la so forma de vida.

Dellos de los temes que debaten:

* Fuelga d'usuarios y usuaries de bancos; pequeños pasos p'amenorgar bultablemente los beneficios de los bancos; Inversión direuta en cooperatives; Rede d'insolventes ya insumisos.
* Recuperación d'edificios vacíos; Masovería urbano; Cooperatives de vivienda de cesión d'usu.

* Autoconstrucción ecolóxica; Cesión de Tierres pa la relocalización agraria; Cooperatives de producción y consumu; Güertos comunitarios; Redes d'intercambéu.

* Economía Comunitaria; Cómo poner en marcha una cooperativa integral; proyeutos de repoblación.

* Campaña pa un tresporte público xusto; Tresporte coleutivo y compartío.

* Cooperativa d'enerxíes anovables; Autoconstrucción de molinos de vientu.

* Educación llibre; Creando Universidaes Llibres.

Fonte:  http://decrecimientoenasturias.blogspot.com/

Coordinación de puntos d'alcuentru

Campaña podemos vivir sin capitalismo

www.17-s.info /

www.sincapitalismo.net

17-S@podem.cat

 

 

El pueblu andaluz ta saliendo a les cais, col Sindicato Andaluz de Trabajadores a la cabeza, nestos momentos de crisis del capitalismu. Les agresiones por parte de les "fuercies de seguridá" son constantes pero tamién la so llucha, un exemplu pa toes y toos.

Les sos vindicaciones principales anguaño son:

1 - Trabayu pa los paraos

2 -  Un PER estraordinariu que dea trabayu a los paraos del mediu rural al menos demientres cuatro meses.

3 - Una moratoria de pagu de les hipoteques pa toles persones en paru.

4 - Que la duración del subsidiu agrario y renta agraria seyan de 10 meses y la so cuantía'l salariu mínimo interprofesional (624 €).

5 - Aides direutes al comerciu y empreses pequeñes, asina como la condonación de dellos impuestos.

6 - El desaniciu de les 35 peonaes como requisitu pa solicitar el subsidiu de desemplegu,

7 - Aides a los pequeños agricultores y cooperatives p'afalar cultivos sociales que xeneren beneficios económicos y trabayu.

8 - El desaniciu del “decretazu” pa que toles persones que reúnan los requisitos puedan solicitar el subsidiu agrariu.

9 - Talleres d'emplegu, escueles taller, cases d'oficiu en base de los paraos/es y al númberu d'habitantes pa cada pueblu y ciudá.

10 - Que los y les trabayadores inmigrantes y les sos families tean incluyíos nestes midíes y puedan acceder a les emprestaciones sociales n'igualdá de condiciones.

UN SALUDU AL PUEBLU ANDALUZ

 

Según l'alcalde que carecemos los uvieínos les fiestes de San Mateo d'esti añu son "una excelente manifestación de ovetensismo y asturianía".

 

Comprobémoslo...

 

VIENRES 11

 

* Xuegos populares con 7 actividaes más, amás d'otres non especificaes nel Palaciu de los neños.

* Pregón: Boris Izaguirre.

* Chupinazu: Mejuto González.

* Teatru: "Felices 30". Compañía madrilana: Secuencia tres.

* Conciertu: Guaraná (pop-rock llatinu), Sole Giménez (pop), La Excepción (Rap). Amás d'actuaciones de Jazz na Plaza'l paragües a cargu de Jacobo de Miguel Cuarteto y Carlos Carli Cuarteto.

* Verbena en El Fontán. Orquesta Estrella del Norte.

* Concursu de Rock "Ciudad de Oviedo".

 

Nula presencia del asturianu, faense unos "xuegos populares", da'l chupinazu un llangreanu, toca una orquesta asturiana y se-yos da "la oportunidá de publicitase a grupos asturianos nel concursu de rock".

 

SÁBADU 12

 

Repítense les actividaes pa los más pequeños y la obra de teatru madrilana.

*Conciertos: Jorge Ilegal y los Magníficos (Rock) , Ojos de brujo (flamencu+mecíu d'estilos) y Los Secretos (Pop-Rock).

* Jazz y otres músiques: Marcio Dhiniz Cuarteto  y Xam Campos Trío.

* Verbena: Nueva Banda.

* Concursu de Rock "Ciudad de Oviedo".

 

Orquesta asturiana, grupu de rock asturianu y más rock nun concursu fechu supuestamente pa promocionar a grupos llocales, patrocináu dafechu por Coca-Cola, que ye lo único qu'apaez nel cartelu. Cero cultura asturiana, nada de llingua y primer grupu flamenquista de les fiestes.

 

DOMINGU 13

 

Esti ye'l día más "asturianu" de toos.

* Romería de Monte Alto (col cartelu percutre fecho a mano, que podeis ver arriba, pero eso si, n'asturianu, cosa que nun apaez nel testu del cartafueyu).

* Narración de cuentinos a cargo de Milio el del Nido (yá tornen hasta'l so nome, pero lo de cuentinos da un toque bable mui guapu).

* Les Pandereteres de Fitoria, Exhibición de Asturcones, venta de productos artesanos y juegos tradicionales.

* Exhibición de deportes autóctonos: Corta de troncos con hachu (ye que tueru nun s'entiende) tronzón y en altura, tiru de barrote, carrera de lecheras, de madrelas, lucha baltu, tiro de cuerda, levantamiento de yunque y piedras, lanzamiento de troncos....

* Carrera de cintas a caballo, concurso de cestas de merienda.

* Escuelina pa Neñus (tal cual), donde los niños podrán conocer la lengua, (si, sobremanera eso) indumentaria y mitología asturiana, y podrán jugar los juegos de corro, sentados a la rana, hacer su propia carioca, aprender a hacer frixuelos, y tortos de maíz, etc... (mecigaya "asturianista")

* Grupo de Baile Tradicional Xuno.

* Recreación de un Mini Zoológico (non si cola fauna que plania estes fiestes da pa munchu...).

* Actuación de Pipo Prendes.

* Les mesmes actividaes pa neños (que non neñus) nel Campu San Franciso y nel Palaciu los neños.

* Conciertos: Canteca de macao (flamencu+mecíu d'estilos), Pignoise (Pop-Rock), Warcry (power metal).

*Les otres músiques de la Plaza'l Paragües: Son Flamenco (obviamente flamencu), Juan Salazar (nun topé referencia), Pepín Salazar (flamencu) y Aires de Levante (+ flamencu).

* Verbena: Orquesta Dominó.

* Concursu de Rock "Ciudad de Oviedo".

 

El día asturianu por escelencia nun ye más que lo de siempre, les migayes pa los "asturianistes" que se conformarán colo qu'heba y una supuesta promoción de la nuesa llingua, destrozada y marxinada por otra parte nel cartafueyu. Cultua asturiana: 1 - Flamencu: 5. Un grupu asturianu metaleru y otra orquesta asturiana.

 

LLUNES 14

* Mesmes actividaes infantiles.

* 10 años de Trebolgu: "Banda de gaitas ciudad de Oviedo", La Curuxa y Dixebra.

Cultua asturiana: 3 - Flamencu: 5 (la banda gaites resta por nun tener el nome n'asturianu).

 

MARTES 14

 

* Segundu día del Real Oviedo.

* Chocolatada.

* Gala Real Oviedo.

* Actividaes infantiles.

* Conciertu de Melendi (pop-rumba-flamencu).

Nacíu n'Asturies si, pero flamenquista. Cultura asturiana: 3 - Flamencu: 6.

 

MIÉRCOLES 16

 

* Mesmes actividaes infantiles (los guahes yá nun van dir, toi viéndolo).

*Gira OT (oh con ún que nació n'Uviéu!!!! eso debe ser l'ovetensismo).

 

* Mesmes actividaes infantiles.

* Conciertu: Tequila ("los nuevos" ¬¬, pop-rock) y Vetusta Morla (indie rock).

* Otres músiques: Bob Shams y Adrian Carrio e Irene Shams Quintetu (Jazz).

* Concursu de Rock "Ciudad de Oviedo".

* Uno más Uno (rap).

Un grupu avilesín de rap, Adrian Carrio que ye uvieín y el supuestu apoyu a los grupos llocales que se quexen tolos años (por qué sedrá).

* Mesmes actividaes infantiles.

* Teatru: "Calcetines Opus 124".

* Conciertu: Sara Baras ("bailaora" flamenca), Chambao ("flamencu chill") y Son de Cuba (salsa).

*Otres músiques: Terela Gradin y Gem, Joaquím Chacón y Mariano Díaz (Jazz).

* Verbena: Orquesta Sonora Real.

* Conciertu de Los Imposibles (Pop-Rock)

Lo único asturianu la orquesta y el concursu de grupos llocales. Más flamencu pal sacu;  Cultua asturiana: 3 - Flamencu: 8. Tampoco nel teatru se dignen a meter a una compañía asturiana...

 

Con esto yá'l flamenquismu gana por goliada....

 

Lo coyonudo ye que nun se queda ehí la cosa - ensin analizar yá tan exhaustivamente como primero, pa nun cansar y porque me paez que quedóyá mui claro... - esti mesmu día actúa Pitingo, el llunes 21 xuntu con La Pantoja apaez otra flamenca, Diana Navarro y dalgo grande vien anunciáu tamién nesta guía tan asturiana, dalgo que va tar na nuestra ciudá depués de les fiestes pa enantar esa visión flamenquista...

Organizáu pola "Peña flamenca Enrique Morente" los mesmos de la misa flamenca.

 

Si esto ye asturianismu que venga l'independentismu...

 

Y col tema económicu yá pa que metese porque entós yá ye pa suicidanos. Los cachés apaecieron toos en LNE y ta nidio'l gastu en flamenquismu aculturización, mentanto'l coste identitariu ye imposible de calcular.

 

PD: Sé qu'hai errores de formatu, pero siéntolo, nun pueo igualos.

Un saludu.

 

Valió de mentires y d'emporcar. La marcha mundial escontra Chávez nun tuvo siguimientu.

Los medios de mases internacionales conseñen con titulares como "Miles de persones marchen en tol mundu escontra Chávez". Otros mas ¿podrá dicise conservadores? como la Folha de Brasil titula "centenes marchen en Venezuela y España escontra Chávez.

El ''Universal de México'' titula "Chilenos se únen a marchas contra Chávez", pero "poco más de una decena de personas". En Bogotá onde nació la idea "la policía reporta que unas 5.000 personas marcharon contra Chávez". "Manifestaciones contra el «intervencionismo» de Chávez en más de 100 ciudades del mundo" titula La Razón del estáu español y namái saca un videu de la "multitudinaria" marcha en Bogotá. De les otres 99 ciudaes del mundu, nanai.

AP fai una llarga reseña onde diz qu'en Bogotá aconceyaron aproximadamente 5.000 persones y la segunda "multitudinaria" marcha tuvo llugar en Tegucigalpa onde marcharon con Micheletti a la cabeza, aproximadamente 5.000 persones también. Reporta qu'en Caraques marcharon alredor de 2.000 persones. En Buenos Aires marcharon alredor de la plaza San Martín ¡200 persones!.

Destaca qu'en Sao Paulo la marcha foi "exigua", pero'l Jornal de Brasil reporta que 15 muyeres aconceyaron nel centru de Sao Paulo. "Alredor d'un centenar de persones manifiesten escontra Chávez en Panamá" (venezolanos residentes) titula EFE. La mesa tuvo servida pal gran despliegue mediáticu de titulares.

La marcha foi un éxitu en cuantes a titulares de prensa, pero non en participantes.

Vía: Kaosenlared

Depués del artículu de va unos díes onde asoleyaba la posibilidá de secesión de Texas de los Estaos Xuníos a manes de Chuck Norris (sic), prestaríame facer un repasu a dellos movimientos esistentes n'Estaos Xuníos que van a la gueta de la so independencia. Pola estensión del mesmu voi xebralu en delles partes. Ehí va la primera:

ALASKA

Representáu principalmente por ''The Alaskan Independence Party''. Un partíu políticu que nagua por un referendu internu qu'incluya la posibilidá de qu'Alaska llegue a ser un país independiente. Sicasí caltien postures asemeyaes a les de ''Constitution Party'' y ''Libertarian Party'', apoyando'l derechu a les armes, les privatizaciones, educación nel llar o la mena de gobiernu llendáu. La formación alcuentrase nel siguiente esprectu políticu: lliberalista llibertaria, soberanista y paleoconservadora.

Tiense dicho que dalgunos de los sos miembros propunxeren que l'estáu esplorara la posibilidá d'amestase Canadá. Dellos militantes espresaron la so oposición a amestase a Canadá na so forma d'anguaño pero taríen abiertos a la posibilidá d'axuntar un estáu canadiense occidental independiente incluyendo'l Yukon y los territorios del noroeste. D'otra banda tamién ye verdá que nengún d'estos plantegamientos llegaron a formar una plataforma que se punxera en contautu col partíu.

-------------------------------

Black Belt (rexón norteamericana)

La ''Black Belt'' (Correa prieta) ye una rexón del sudeste de los Estaos Xuníos. Anque'l términu orixinalmente describía les praderes y el suelu escuru d'Alabama central y del noreste de Mississippi, tamién s'emplega pa describir l'amplia rexón carauterizada pol so porcentaxe altu d'afroamericanos. Les comunidaes na ''Black Belt'' enfréntese davezu a la probeza, l'éxodu rural, programes educativos inadecuaos, fracasu escolar, baxa atención sanitaria y a niveles altos de crime y desemplegu.

La secesión vese representada por dos movimientos; el RNA y ''New Black Panther Party'' (Partíu Nuevu de les Panteres Prietes).

* El RNA foi una organización social que propunxo tres oxetivos: Primero, la creación d'un país independiente cola mayoría negra allugáu na rexón del sureste de los Estaos Xuníos. El proyeutu pa esti país foi promulgáu'l 31 de marzu de 1968, nuna conferencia fecha en Detroit. En segundu llugar, esixeron varios miles de millones de dólares d'indemnización al gobiernu de los EEXX polos daños fechos a persones negres pol mobbing inmobiliariu, la segregación de Jim Crow, y les diverses formes de racismu carecíes. Per últimu, esixeron un plebiscitu de tolos afroamericanos pa decidir qué se debía facer colos sos ciudadanos. El nome escoyíu pal estáu nuevu qu'habría surdir foi'l de ''Republic of New Afrika''.

-------------------------------

Lakota Sioux

Los lakota, que na so llingua significa "amigu" o "aliáu", foron un pueblu sedentariu afincáu nes márxenes del norte del ríu Missouri. A finales del sieglu XVIII taben na pradera central del subcontinente norteamericanu. Col tiempu y el puxu de los colonos d'orixe europeu convirtiéronse nun pueblu nómada, ocupando lo que güei son los estaos de Minnesota, Dakota del Norte, Dakota del Sur, Nebraska y Wyoming. Xebráronse en dos grandes grupos: los Dakota que yeren mayoritariamente agricultores y los lakota que se fixeron cazadores y pasaron a dominar una amplia zona de la pradera, sobremanera dende la llegada del caballu, introducíu polos españoles. El so dominiu foi diliendose a midida que la llende de los Estaos Xuníos avanzaba hacia l'oeste y diba estinguiendo los bisontes, fonte de subsistencia d'esti pueblu. Les grandes batalles y los conflictos foron el golpe final pa les tribus a les que se privara de los medios de supervivencia y a quienes se-yos importaren malures y alcohol, que resultaren les principales causes de la so mortalidá.

Anguaño tienen representación na UNPO y allúguense na ''Lakotah Oyate'' (República de Lakota) una entidá xeneralmente non reconocida y autoproclamada dientro de los Estaos Xuníos en parte de los estaos de Dakota del Norte, Dakota del Sur, Nebraska, Wyoming y Montana.

La República de Lakota propon que la nación s'organice como confederación y tienen buscao'l reconocimientu internacional pa Lakota nes embaxaes de Venezuela, Bolivia, Chile y Sudáfrica, afirmando qu'Irlanda y Timor Oriental tán «mui interesaos». Esperen reconocimientu de Rusia, y ficieron referencia a Finlandia y Islandia tamién, pero nengún d'estos países anunció públicamente la reconocencia de la so independencia.

Un saludu.

Esti xueves 16, el rei d'España, va venir a Asturies a inaugurar la tercera fase de les obres d'ampliación de la Clínica Fernández-Vega.

Dende l'Ensame República Asturiana, consideren esto como una humillación al pueblu asturianu, "porque n'Asturies nun pinta nada nin un rei, nin una clínica privada onde faise servicios de baldre y importantes descuentos a miembros de la Guardia Civil y cures".

Poro, convoquen pa esti miércoles día 15 una concentración de refugu a la visita del rei n'Uviéu na Plaza Escandalera a les 17.30 hores y otra concentración el día 16 n'Uviéu na Plaza arzobispu Gabino Díaz Merchán a les 11.30 hores onde tendrá llugar la inauguración.

Fonte: Glayíu

Quiero tamién amestar el documentu asoleyáu pol ERA nel que fuera'l so primer actu públicu cola manifestación pola república asturiana demientres los Premios Príncipe.

1) Asturies vive nuna situación antidemocrática dafechu, na que los valores republicanos y los derechos sociales y nacionales vienen siendo negaos y xabazmente reprimíos per parte del estáu español, formáu en Reinu.

2) Una de les espresiones sociales más significatives d'esti fechu ye la denomación institucional d'Asturies como "Principado", figura política impuesta a esti Pueblu qu'afala'l vasallaxe y el servilismu a una institución arcaica, elitista y antidemocrática cola qu'Asturies y les asturianes y asturianos nada ganamos nin tenemos nada que ver.

3) Oponémonos a cualquier tipu de réxime monárquicu, por ser ésti'l paradigma de la desigualdá social y la falta de derechos con impunidá llegal. Tampoco podemos escaecer que la designación del monarca español foi fecha durante'l franquismu, siendo ésti designáu y coronáu a deu directamente pol propiu dictador, ensin qu'entá viéremos enfotu dalu nesta institución predemocrática por pedir perdón tres cuarenta años de fascismu xenocida col beneplácitu del sistema llegal 'constitucional' actual.

4) Denunciamos el compromisu col capitalismu xabaz, asesín de tolos pueblos del mundu, que remanez de la monarquía española, siendo ésta garante de la defensa de les clases privilexaes y de la desigualdá económica, social y de derechos. Refugamos, tamién, les actitúes machistes, homófobes, represores y censores que surden dende la monarquía española, qu'afiten, una vegada más, el so orixe feudal y arcaicu, comportamientos mui estremaos a los que defendemos nosotres y nosotros.

5) Consideramos una humildación a Asturies la cellebración de los 'Premios Príncipe de Asturias', considerándolos una coartada pa 'llavar la cara' internacionalmente a la monarquía, faciéndola pasar por institución moderna y que respeta la cultura, visión mui alloñada d'una, muncho más cercana a la realidá, de 'familia de vividores a sueldu de toes y toos' que conocemos perbién y manipulando al traviés de los medios españolistes, al tiempu, la imaxe de la sociedá asturiana. Poro, nun podemos dexar de pidir la crítica pa los galardonaos por estos 'premios de pandereta', que faen el xuegu cómpliz a la monarquía española, nin dexar d'ablucar y protestar, tampoco, polos costes de les fartures 'reales' a cargu de los nuestros impuestos –nestos tiempos de crisis– , asina como de la situación d'estáu y ocupación militar y policial ostentoria que nel nuestru país se xenera con cualaquier 'visita' de los miembros d'esa familia 'real'.

6) Queremos afitar dende agora mesmo la necesidá d'articular y crear un movimientu republicanu asturianu que lluche pola lliberación d'esti país y refugue cualquier tipu d'opresión nacional y social, como la que constitúi la monarquía española y cualquier réxime monárquicu. Asina, namás entendemos un cambiu de modelu de país pa construyir una República Socialista asturiana onde los valores republicanos d'igualdá, llibertá, accesu a la cultura y llaicismu seyan los finxos que caltengan la nuestra llucha por una Asturies xusta y un mundu de pueblos llibres.

¡¡PUXA LA REPÚBLICA ASTURIANA, SOCIALISTA Y SOBERANA!!

Un saludu.

Dende l'orixinal de Glayíu (correxíos dellos errores n'asturianu).

-------

Un saludu.

Un espaciu autoxestionáu.

Llibre de la especulación.

Llibre de la individualización y l'aisllamientu al que mos someten les rellaciones llaborales d'anguaño, económiques y sociales impuestes dende mui arriba.

Abiertu a les persones, los movimientos sociales y vecinales.

Un espaciu pa construyir.

Un espaciu pa reFLEXonar.

Un llugar p'alcontrase.

Pa combatir l'aburrición.

Pa facer cuña.

Y munchu más...

...tolo que la xente que lu construya maxine...

Cuerren tiempos nos que'l poder mos impon crisis, recortes nes conquistes sociales, especulación, privatizaciones y un pensamientu únicu basáu nos principios del "incuestionable" capitalismu.

Al empar cuerren tiempos nos que quieren frañir los procesos de llucha coleutiva naguando por que les nueses mentes porten un mecíu de pasividá y conformismu y afondando la insolidaridá y l'egoísmu.

Ensin dubia cuerren tiempos nos que fai falta Reflexón...

Poro naz el CSOA "La ReFLEXón".

Col enfotu de crear un espaciu onde axuntar a la xente alrodiu d'un proyeutu tresformador, un grupu heteroxéneu de persones decidimos rehabilitar un vieyu edificiu abandonáu, asitiáu nel barriu xixonés de La Calzada.

Naguamos por facer d'esti llugar un Centru Social Ocupáu Autoxestionáu onde desendolcar la xera tresformadora que carauteriza a los CSOA.

Naguamos por plantegar y crear alternatives al sistema social, económicu y cultural impuestu al traviés del fomentu la cultura alternativa, la formación crítica y la defensa d'unos valores igualitarios y solidarios.

Naguamos pola creación d'un espaciu constructivu y horizontal, onde axuntar baxo un mesmu techu a persones y coleutivos d'estremaes sensibilidaes que tengan l'oxetivu común de construyir un mundu meyor.

Naguamos por ufiertar a los vecinos del barriu La Calzada y de la ciudá de Xixón un llugar d'alcuentru onde compartir ilusiones, esmolecimientos y trabayar pol barriu, dando-y vida a l'antigua fábrica de la FLEX, llugar muertu nun barriu afectáu gravemente pola reconversión y que, dempués de diez años, resucita como CSOA.

Ye por eso que'l CSOA “La ReFLEXón” naz nun espaciu abandonáu col enfotu de convertise nun llugar onde construyir, deprender, axuntar y plantegar alternatives a les coses que queremos camudar.

Queden convidaes toles persones de toa condición, movimientos sociales, organizaciones xuveniles, vecinos y vecines y xente de toa triba a participar na construcción d'esti espaciu...

Si tu tamién ties interés en facer la mesma xera que nós, nun dubies en pasate pel:

CSOA “La ReFLEXón”.
Avd. Príncipe d'Asturies, 19
La Calzada, Xixón.

BUS 1, 4, 12 y 16. Parada Cuatro caminos.

Abrazos. Construyendo suaños...

Comunicáu asoleyáu en Glayíu pol CSOA "LA REFLEXÓN".
---------------------------------------------------------------

Un saludu.