Convocatories a la militancia pa esti sábadu
Énte la prohibición por parte de Delegación del Gobiernu Español n'Asturies de la concentración convocada pola Coordinadora Antifacista d’Asturies pal día 16 de Febreru de 2008 na cau San Mateo, queremos informar de:
La Coordinadora Antifacista presentó recursu y alegaciones por vía xudicial escontra la prohibición. La sentencia conoceráse, finalmente, pa mañana xueves.
Independientemente de la decisión que tome'l xuez, permitanos o non concentranos na redolada del llocal “madhouse” en San Mateo, la Coordinadora Antifacista anuncia que nun mos vamos concentrar nesi llugar, al considerar que l'oxetivu de la concentración "nin racismu, nin xenofobia", informar a la ciudadanía de les actividaes neonazis que se desendolquen nesi llocal del barriu, tán cumplíes. Albidramos que, en trescendiendo la noticia en prensa, nun ye prioritariu incidir na denuncia informativa, pues yá ye público y notorio'l tipu d'actividaes que se desendolquen nel mentáu llocal. En nengún momentu foi la nuesa intención, magar qu'asina lo quixera al traviés de los sos testos Delegación del Gobiernu Español n'Asturies, buscar engarradielles con grupos d'estrema derecha. El nuesu envís, repetimos, yera denunciar socialmente'l fascismu y el racismu y informar a la ciudadania énte la dexación de les autoridaes nesta materia.
Anunciamos una concentración pal sábadu día 16 a les 12:00 hores de la mañana na Plaza d'España, Uviéu, sede de la Delegación del gobiernu Español, baxo'l mesmu lema, “Nin racismu, nin xenofobia”. Facemoslo pa protestar énte'l Delegáu del Gobiernu Español pola medra de la violencia d'estrema derecha organizada n'Asturies, en denuncia polos determinos tomaos por Antonio Trevín, Delegáu del Gobiernu Español, conocedor de les actividaes organizaes d'estrema derecha n'Asturies. Queremos saber por qué se consienten actos d'exaltación del racismu y el nazismu n'Asturies. Queremos saber por qué nun s'informa a la ciudadanía sobre'l riesgu que supón la presencia masiva de neonazis nun actu delictivu.
COORDINADORA ANTIFACISTA D’ASTURIES
13 DE FEBRERU DE 2008
Col determín de denunciar el despreciu col que la Conseyería d’Educación trata al asturianu, la Xunta va poner escuela de llingua asturiana na cai. El sábadu día 16 de febreru a la una del mediudía, na Plaza la Escandalera d’Uviéu, un mayestru d’asturianu va deprender delles nociones básiques del nuesu idioma, como debiere facese en toles escueles y a la vista de tou aquel que quiera dir o que pase pela cai nesi momentu.
La clase ye abierta y puen dir rapacinos y rapacines, homes y muyeres. Cualquiera pue averase a La Escandalera y asistir a una clase de llingua asturiana en condiciones. Amás, quiciabes se presente dalgún escolín inesperáu.
Esta idea de la Xunta vien a ser un pasu más na campaña recién de denuncia de la situación actual de la escolarización del asturianu, onde rescamplen de contino casos d’ataques al idioma. A mou d’exemplu podemos citar el casu de la Escuela Pública Ríu Piles, en Xixón, onde se fai competir l’asignatura d’asturianu col llinguaxe de señes, convirtiendo pela vía de los fechos l’asignatura d’asturianu nuna "optativa", en cuenta de "voluntaria", como ta afitao por llei y nel testu del currículu de la Enseñanza Primaria.
Tamién a mou d’exemplu, la pesentación del currículu pa la Educación Infantil asoleyáu nes últimes selmanes pol conseyeru que, ensin espeluricase, presenta como un exemplu d’avance na educación cuando nun ye otra cosa qu’un pasu más nel desaniciu del asturianu, que traten otra vuelta como una llingua de cuarta categoría. Como se ve nel testu del borrador: primero’l castellanu, depués la llingua estranxera, depués les otres llingües y, pa nun face-y un feu, l’últimu, l’asturianu. La Xunta quier facer rescamplar la responsabilidá que tien la Conseyería d’Educación en toa esta llaceria.
Por too ello, la Xunta pola Defensa de la Llingua Asturiana fai un llamáu a tola comunidá escolar, a tolos falantes y tou aquel que vive o trabaya n’Asturies pa que participe nesta movilización.
PD:Como ye vezu dende fueya en blancu ufriráse una crónica con videos de los 2 actos.
PUXA ASTURIES ANTIFASCISTA
L'ASTURIANU LLINGUA OFICIAL YÁ
Un saludu.
Esbilla
del.icio.us
VITY
