Por motivos personales veome obligáu a dexar pa prau'l blogue demientres un tiempu, camiento que como munchu sedrán 3 meses.

Un saludu.

Jorge ye fíu de Juana Calfunao, lonko de la comunidá, que permanez encarcelada dende l'añu 2006 na cárcel de Temuco. La situación d'esta comunidá ye realmente dura por mor de la represión estrema a la que se lleven enfrentando dende va años.

Na entrevista concedida a "La Haine", fecha a entamos de marzu d'esti 2008, Jorge amuesa cuala ye la situación que tien vivida en concretu la so comunidá, amás como analiza'l contestu xeneral y la situación de la llucha mapuche. Anguaño tán en prision amás de la lonko[1], el pá de Jorge, que ye'l werken[2], Luisa Calfunao (tía de Jorge) y Waikilaf (hermano). Jorge alcuentrase en llibertá dende va unos meses, pos él tamién permaneció encarceláu demientres más d'un añu.

La entrevista evidencia, tomando'l casu d'una comunidá concreta, que realmente esiste un asediu xeneralizáu por parte del estáu chilenu escontra les comunidaes mapuches que permanecen en llucha dende va más de 5 sieglos pola autonomía y el respetu del so territoriu.

En mapudungun (fala de la tierra) o llingua mapuche, significa lo que vien darréu:
[1]Xefe/a
[2]Voceru

Un saludu al pueblu mapuche.

Perbona iniciativa de l'Asociación Green, qu'amás del sitiu web "AsturiasVerde" y del programa "AsturiesVerde" n'Onda Peñes, agora suma un informativu en formatu vidiu centráu nel conceyu de Carreño. Nesta primer edición los temes son:

* Les obres de las fachada marítima de Candás. Lleguen los cubos al pueblu. Entrevista a Luís Fernández, voceru de l'asociación de vecinos de Candás, pa que cuente como ven los vecinos l'aplicación del nuevu sistema de recoyida de residuos.
* Quexes ciudadanes: Les faroles que nun furrulen na plaza del Azabache, nel barriu de Piñeres. Saturación del contenedor de recoyida seleutiva d'aceites del parque de Santarua
* Axenda: Selmana Santa en Candás. Concursu de marca páxines organizáu pola Bibliteca Municipal.

Un saludu.

Semeya del camarada rusu asesináu.

El 16 de marzu, alredor de les 18:30h nel centru de Moscú a la salida de la estación de metro de Kitai-Gorod, un grupu de cerca de 15 neonazis armaos con cuchiellos atacaeon a 7 persones que diben a un conciertu hardcore/punk encabezáu pola banda Oi! NICHEGO KHOROSHEGO de Karelian nel club Art Garbage. A resultes del ataque, un mozu punk de 16 años, Alexei Krylov de Noginsk (Moscú), morrió por mor de les firíes múltiples d'una puñalada mortal, enantes d'aportar l'ambulancia.

Una moza atacada nel mesmu incidente tuvo más suerte, el cuchiellu altravesó la so fardela pero quedó a una pulgada del so cuerpu. Según les noticies, había bayura nazis na zona qu'atacaben a los antifascistes en grupos de 10-15.

El conciertu foi canceláu depués que dalgún esprai de pimienta fuera utilizáu dientro y unos desconocíos estrozaren les ventanes.

L'ataque paez tar preparao con antelación por dalgunos hooligens del Spartak FC.

Va cásique dos años en Moscú, Alexander Ryukhin de 19 años fuera asesináu por una banda nazi de camín a un conciertu hardcore.

¡Valió d'impunidá fascista! ¡Escontra'l fascismu nengún pasu atrás!

Un saludu.

Yá prestaría una campaña asina "a la asturiana".

Un saludu.

Güei la enciclopedia llibre n'asturianu ta acabante de llegar a esa cifra. El proyeutu que ñaciera en 2004 nun dexó de medrar y ufre yá esa bultable cifra, amás alcuentrase dende ayeri na denominada "Quincena a sestaferia" entamada "al envís d'ameyorar, enantar y encadarmar la Uiquipedia a lo llargo de quince díes, ufriendo asina una mayor calidá del proyeutu, faciéndola más útil y afitando una ferramienta pal espardimientu del asturianu na rede."

Ente les xeres que se van desendolcar esta quincena tán:
* Enantar entamos.
* Iguar errores ortográficos, de uiquificación o de conteníu.
* Iguar plantíes y estandarizales colos artículos venceyaos.
* Tornar testos d'imaxenes que tean n'otra llingua estremada al asturianu.
* Estandarizar el rexistru llingüisticu.
* Categorizar y remocicar les páxines de les mesmes.
* Añader interwikis.

Amás, nesta primer edición ye importante procurar nun crear artículos sinón remocicar los yá esistentes poniendo especial procuru nos artículos de los países, daqué fundamental d'una enciclopedia, y mirando pola calidá (y veracidá) de los artículos rellacionaos con Asturies.

Un saludu.

Direutamente copiote'l post pero ye que, inda siendo la enesima vez que lu veo, foi quien a poneme una sorisa na cara, espero qu'a daquién más tamién nestos díes tan murnios...

¡Nun diba ser yo menos n'ufrir los resultaos eleutorales y pa enriba n'asturianu!

Un saludu.

¿Realmente tienen les idees clares?

Dende qu'entamó la campaña, al traviés del candidatu del Partíu Popular n'Asturies, vieronse dellos guiños al asturianu (siempre pa facer risión) que yeren los habituales de Gabino de Lorenzo. Dende'l blogue de "L'Asturies Lliberal" allababen esos xestos y como yera lo normal tolos votantes nacionalistes d'izquierdes vimos que nun yera nada nuevo y que taba faciendo lo de siempre, populismu.

Pero la bola empecipió a medrar, entró en xuegu'l PSOE pidiendo que retiraren l'asturianu de la campaña eleutoral (como si tuvieren poder pa decidir qué temes son los que-yos interen a los asturianos) y Gabino siguió erre qu'erre cola so defensa llingüistica, a la que se sumó xente como'l sobrín de la "Tía Nemesia" y Pilar Fernández que yá amosara cierta consideración pa col asturianu al facer un casoriu na llingua de nueso nel conceyu de Xixón y al tar na fundación Caveda y Nava. Agora tamos nel puntu de que polo vistu hasta les NN.GG (Mocedaes del PP), y quiero aclarar; siempre en campaña, tán saliendo a la defensa de la "oficialidá ensin obligatoriedá/imposición", amás d'abondos representantes d'esti partíu. Y entrúgome yo...¿Porqué agora?

Va unos meses les declaraciones por parte de cabezaleros del partíu como Ovidio yeren clares "la llende ye la oficialidá", ¿porqué agora si se pue trespasar esa llende?, ¿porque tamos n'eleiciones?: si, pue ser, foi lo que pensamos toos nun entamu y lo que la mayoría piensen agora, pero si nun ye asina la otra opción ye que dende dientro al traviés d'asturianistes de dereches, como Humberto Gonzali, algamose un cambeu d'opinión de cara al estatutu.

Si ye asina, el PP y IX xuntos, arrequexarien al PSOE nesti tema y sacaríenlo adelantre, tendríemos de xuru una oficialidá feble, la más feble del estáu pero tendriemos dao tamién un reblagu perimportante na defensa de la llingua. Y digo tenemos porque si dalgún día llega la oficialidá, nun va ser gracies al PP nin a IX, sinón al movimientu social que lluchó demientres 30 años, de forma pacífica, por esa reconocencia. Movimientu qu'aguantó lo indecible; argumentos de lo más mazcayo "nun ye llingua, onde vais, nun lo fala naide, quereis imponer un asturianu de llaboratoriu...", multes, sentencies xudiciales y hores y hores de trabayu pegando cartelos y faciendo milenta actos pa que la vindicación del asturianu y de lo asturiano tuviera presente nos más de los sitios posibles. Poro, si llega la oficialidá nun hai que-y lo agradecer a nengún partíu, hai que s'allegrar porque una llingua milenaria nun va morrer si siguimos poniendo procuru n'ello, hai que s'allegrar porque ganó'l movimientu de vindicación llingüistica y hai que s'allegrar porque un pueblu, l'asturianu dio un pasu más col que mirar con daqué d'enfotu'l so futuru como pueblu.

¡L'asturianu llingua oficial!

Un saludu.

Publicidá gratuita:

Primeres reacciones del antifascismu militante.

La Xunta Eleutoral d'Asturies vien de dictar una resolución na qu'obliga a Democracia Nacional a retirar "inmediatamente y sin dilación" unos cartelos eleutorales nos que se fai una alusión maniquea de la tasa de delincuencia por parte de los inmigrantes. Estos cartelos xenofobos yeren totalmente una vergoña y ye un gran llogru que desapaezan de les cais.

¡ILLEGALIZACIÓN DE DN YÁ!
¡ASTURIES ANTIFASCISTA!